بەنزين باعاسى العاشقى كەزەڭدە 210 تەڭگەگە دەيىن بارۋى مۇمكىن - ا. ساتقاليەۆ
استانا. KAZINFORM - ەنەرگەتيكا ءمينيسترى الماسادام ساتقاليەۆ ب ا ق وكىلدەرمەن وتكەن باسپا ءسوز ءماسليحاتىندا اقپان ايىندا اي-92 ماركالى بەنزيننىڭ باعاسى 210 تەڭگەگە دەيىن ءوسۋى مۇمكىن ەكەنىن ايتتى.

- ءبىرىنشى قادامدا باعا 210 تەڭگەگە دەيىن قىمباتتايدى دەپ باعدارلاپ وتىرمىز. ءارى قاراي نەشە قادام جاسايتىنىمىزدى نارىق رەتتەۋى كەرەك. ءبىزدىڭ مىندەت باعانىڭ تۇراقتىلىعىن قامتاماسىز ەتۋ بولادى.
ءبىز سونشالىقتى ءبىر كۇيرەتەتىندەي وزگەرىس كۇتىپ وتىرعان جوقپىز. بۇعان دەيىن بەنزين باعاسى 400 تەڭگەگە دەيىن بارادى ەكەن دەگەن ويلانباستان ايتىلعان مالىمەتتەر تارادى. ونداي وسۋگە جول بەرمەيمىز، - دەدى الماسادام ساتقاليەۆ.
ەسكە سالساق، ۇكىمەتتىڭ كەڭەيتىلگەن وتىرىسىنان كەيىن اقپان ايىنان باستاپ بەنزين، ديزەل، سۇيىتىلعان گاز باعاسى وسەتىنى ءمالىم بولعان ەدى.
اۆتور
ەسىمجان ناقتىباي