بەلگىلى عالىم قۇنىپيا الپىسبايەۆ دۇنيەدەن ءوتتى

استانا. KAZINFORM - قازاقستان جازۋشىلار وداعىنىڭ مۇشەسى، ادەبيەتتانۋشى عالىم، فيلولوگيا عىلىمدارىنىڭ دوكتورى، پروفەسسور، ق ر ءبىلىم بەرۋ ۇزدىگى قۇنىپيا الپىسبايەۆ ومىردەن وزدى. بۇل تۋرالى مادەنيەت جانە اقپارات مينيسترلىگىنىڭ باسپا ءسوز قىزمەتى حابارلادى.

قۇنىپيا الپىسبايەۆ 1949 -جىلى تامىزدىڭ 4-جۇلدىزىندا قىتاي حالىق رەسپۋبليكاسىنىڭ قۇلجا اۋدانىنىڭ بايانداي اۋىلىندا دۇنيەگە كەلگەن.

قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن ءتامامداپ، ۋنيۆەرسيتەت باسشىلىعىنىڭ ۇسىنىسىمەن كاسىپوداق كوميتەتى ءتوراعاسىنىڭ ورىنباسارى، دايىندىق ءبولىمى دەكانىنىڭ ورىنباسارى، سىرتتاي وقىتاتىن فيلولوگيا فاكۋلتەتىنىڭ دەكانى قىزمەتتەرىن اتقاردى.

1986-جىلى «قازىرگى قازاق پوەماسىنىڭ جانرلىق ماسەلەلەرى» جانە 2000 -جىلى «قازاق ادەبيەتىندەگى تاريحي شىعارما: تانىم مەن كوركەمدىك» اتتى تاقىرىپقا دوكتورلىق ديسسەرتاتسيا قورعاپ، 2001-جىلى پروفەسسور اتاعىنا يە بولدى. ەلىمىزدە العاش اشىلعان «ادەبي شىعارماشىلىق» جانە «كوركەم اۋدارما تەورياسى» سەكىلدى ماماندارىن دايىنداۋدا ساپالى وقۋ-ادىستەمەلىك كەشەندەرى مەن باعدارلامالارىن ازىرلەگەن. كوپتەگەن سىن-زەرتتەۋ ماقالاسىنىڭ ءبىرقاتارى شەتەلدە، ياعني، تۇركيا، قىتايدا باسىلعان.

ق ر مادەنيەت جانە اقپارات مينيسترلىگىنىڭ ۇجىمى قۇنىپيا قوجاحمەت ۇلىنىڭ ومىردەن وتۋىنە بايلانىستى تۋىستارى مەن جاقىندارىنا كوڭىل ايتادى.

اۆتور

ابىلايحان جۇماشيەۆ