بەلارۋس شىلدەدە وتەتىن سامميتتە ش ى ۇ- نىڭ تولىققاندى مۇشەسى بولادى

استانا. KAZINFORM - ۇيىمنىڭ شىلدە ايىندا استانادا وتەتىن الداعى سامميتىندە بەلارۋس ش ى ۇ- نىڭ تولىققاندى مۇشەسى بولادى. بۇل تۋرالى بەلتا اقپارات اگەنتتىگى جازدى.

بۇل تۋرالى ش ى ۇ باس حاتشىسى جان مين تاشكەنتتە وتكەن شاڭحاي ىنتىماقتاستىق ۇيىمىنىڭ «جاڭا جاعدايداعى ش ى ۇ ءرولى: جالپىعا بىردەي قاۋىپسىزدىك، تۇراقتىلىق جانە وركەندەۋ جولىنداعى كۇش- جىگەردى بىرىكتىرۋ» فورۋمىندا ايتتى.

جان مين ۇلكەن وتباسى مۇشەلەرىنىڭ سانى ارتىپ كەلە جاتقانىن اتاپ ءوتتى.

«كەلەسى ايدا استانادا وتەتىن سامميتتە بەلارۋستىڭ ش ى ۇ- عا قوسىلۋى تۋرالى شەشىم قابىلدانادى، وسىلايشا مۇشە مەملەكەتتەردىڭ سانى تاريحي ەكى تاڭبالى سەرپىلىسكە جەتەدى»، - دەدى ول.

ش ى ۇ باس حاتشىسى سونداي-اق «20 جىلدان استام دامۋ بارىسىندا قۇرىلىم مەملەكەت باسشىلارى كەزدەسۋلەرىنىڭ وڭىرلىك تەتىگىنەن ەڭ اۋقىمدى، تەگىس قامتي الاتىن حالىقارالىق ۇيىمعا اينالۋى» فاكتىسىنە نازار اۋداردى.

ۇيىم اياسىنداعى ىنتىماقتاستىقتىڭ پەرسپەكتيۆالى باعىتتارى تۋرالى ايتا وتىرىپ، جان مين ش ى ۇ ساياسات، ديپلوماتيا، بەيبىتشىلىك، دامۋ، قاۋىپسىزدىك سياقتى «جوعارى دەڭگەيدەگى» مىندەتتەرگە عانا ەمەس، سونىمەن قاتار تۋريزم، سپورت، قالدىقتاردى كادەگە جاراتۋ سياقتى «حالىققا جاقىن» تاقىرىپتارعا دا نازار اۋداراتىنىن اتاپ ءوتتى.

«جوعارىدا اتالعان جەتىستىكتەر شانحاي رۋحىنىڭ ورتاق مۇددەلەرگە، ۇيىمنىڭ قاۋىپسىزدىك پەن تۇراقتىلىقتى ساقتاۋ، تۇراقتى دامۋدى قامتاماسىز ەتۋ جونىندەگى باستاپقى ماقساتىنا سايكەس كەلەتىنىنىڭ سەنىمدى دالەلى جانە شىۇ ىنتىماقتاستىعى ودان ءارى نىعايا تۇسەدى»، - دەپ سانايدى ول.

5 -ماۋسىمدا تاشكەنتتە شاڭحاي ىنتىماقتاستىق ۇيىمى فورۋمىنىڭ 19- وتىرىسى ءوتىپ جاتىر. شارانى وزبەك تاراپىنىڭ توراعالىعىمەن وزبەكستان رەسپۋبليكاسى پرەزيدەنتى جانىنداعى ستراتەگيالىق جانە ءوڭىرارالىق زەرتتەۋلەر ينستيتۋتى ۇيىمداستىرىپ وتىر. ونىڭ جۇمىسىنا 10 ەلدەن 40-تان استام ساراپشى، ونىڭ ىشىندە ش ى ۇ- عا مۇشە مەملەكەتتەردىڭ ۇلتتىق عىلىمي ورتالىقتارىنىڭ وكىلدىك دەلەگاتسياسى، باقىلاۋشى مەملەكەتتەردىڭ ماماندارى جانە ديالوگ بويىنشا سەرىكتەستەر، سونداي-اق ش ى ۇ حاتشىلىعى مەن ش ى ۇ ايماقتىق لاڭكەستىككە قارسى قۇرىلىمى اتقارۋشى كوميتەتىنىڭ باسشىلىعى قاتىسادى.

اۆتور

زارينا تۋعانبايەۆا