بۇل جىل سىزدەرگە ارنالدى: پرەزيدەنت حالىقارالىق ەرىكتىلەر جىلىمەن قۇتتىقتادى

- سىزدەر - جاس، جىگەرلى ازاماتسىزدار. ۆولونتەرلىك قىزمەتپەن اينالىسىپ جۇرسىزدەر. وتە دۇرىس. مەن ەرىكتىلەردىڭ ەڭبەگىن قولدايمىن. بۇل - ەلگە شىنايى جاناشىر بولۋدىڭ ناقتى كورىنىسى، - دەدى قاسىم-جومارت توقايەۆ پرەزيدەنت ساياباعىندا وتكەن «تازا قازاقستان» ەكولوگيالىق اكسياسىندا.

مەملەكەت باسشىسى 2020-جىل ۆولونتەر جىلى رەتىندە اتالىپ وتكەنىن ەسكە سالدى. سونداي-اق بىرىككەن ۇلتتار ۇيىمىندا سويلەگەن سوزىندە ول حالىقارالىق ۆولونتەرلەر جىلىن بەلگىلەۋ تۋرالى باستاما كوتەردى.

- بۇل ۇسىنىسىمدى الەم ەلدەرىنىڭ بارلىعى دەرلىك قولداپ، 2026-جىل حالىقارالىق ۆولونتەرلەر جىلى بولىپ جاريالاندى. بۇل جىل سىزدەرگە ارنالدى. بۇدان بولەك، قازاقستان - ۆولونتەرلىك قىزمەتتى ەڭ جوعارى زاڭ دەڭگەيىندە، ياعني كونستيتۋتسيادا بەكىتكەن ساناۋلى مەملەكەتتەردىڭ ءبىرى. وسى ورايدا، ەلىمىزدەگى جانە شەتەلدەگى بارشا ەرىكتىلەردى شىن جۇرەكتەن قۇتتىقتايمىن!، - دەدى ق. توقايەۆ.

بىلتىر پرەزيدەنت بۇۇ مىنبەرىنەن ەلىمىزدە «تازا قازاقستان» بىرەگەي جوباسى تابىستى جۇزەگە اسىرىلىپ جاتقانىن ايتقان ەدى.

- سونىڭ نەگىزىندە بۇۇ باس اسسامبلەياسىنىڭ 80-سەسسياسىندا 22-ءساۋىردى «حالىقارالىق جەر شارىن كوگالداندىرۋ كۇنى» دەپ جاريالاۋدى ۇسىندىم. بۇل باستامانى دا ب ۇ ۇ باس اسسامبلەياسىنىڭ بارلىق مۇشەسى تۇگەل قولدادى دەۋگە بولادى. مۇنىڭ ءبارى قازاقستاننىڭ دۇنيە جۇزىندەگى وزىق ۇردىستەردى تەرەڭ ءتۇسىنىپ، زامان تالابىنا ساي دامىپ كەلە جاتقانىن كورسەتەدى. وسىلايشا، ەلىمىز الەمدەگى بەيبىتشىلىكتى ساقتاۋعا ءوزىنىڭ ەلەۋلى ۇلەسىن قوسىپ وتىر. ەلىمىزدىڭ بولاشاعى - سىزدەر سياقتى ءبىلىمدى، بەلسەندى، كوزى اشىق، كوكىرەگى وياۋ، تالاپتى جاستاردىڭ قولىندا! جولدارىڭىز ءاردايىم اشىق بولسىن!، - دەدى مەملەكەت باسشىسى.

ايتا كەتەيىك، مەملەكەت باسشىسى قاسىم- جومارت توقايەۆ «تازا قازاقستان» ەكولوگيالىق اكسياسىنا قاتىستى جانە جاس ەكوبەلسەندىلەرمەن بىرگە پرەزيدەنت ساياباعى اۋماعىندا اعاش ەكتى.

جىل باسىنان بەرى «تازا قازاقستان» اكسياسىنا 7 ميلليون ادام قاتىسىپ، 130 مىڭ گەكتار جەر تازارتىلعان.