بەكتەنوۆتاسقىننان زارداپ شەككەن تۇرعىندارعا ارناپ سالىنعان ۇيلەردى تەكسەردى
استانا. KAZINFORM - پرەمەر- مينيستر ولجاس بەكتەنوۆ جۇمىس ساپارىمەن ەلىمىزدىڭ باتىسىنا باردى. باستى ماقسات - مەملەكەت باسشىسىنىڭ سۋ تاسقىنىنان زارداپ شەككەن ازاماتتاردى باسپانامەن قامتاماسىز ەتۋ جونىندەگى تاپسىرمالارىنىڭ ورىندالۋ بارىسىن تەكسەرۋ.
جۇمىس كەستەسىنەن ارتتا قالۋ بايقالعان باتىس قازاقستان جانە اقتوبە وبلىستارىنىڭ اۋىلدارى مەن كەنتتەرىنە باسا نازار اۋدارىلادى (بيىلعى 17-شىلدەدەگى پرەمەر-ءمينيستردىڭ توراعالىعىمەن وتكەن سۋ تاسقىنىنان كەيىن تۇرعىن ۇيلەر مەن ينفراقۇرىلىمدى قالپىنا كەلتىرۋ ماسەلەلەرى جونىندەگى كەڭەس).
باتىس قازاقستان وبلىسىندا ۇكىمەت باسشىسى تەرەكتى اۋدانىنداعى پودستەپنوە اۋىلىندا، دەركول كەنتىندە جانە ورال قالاسىنداعى «جۇلدىز» ىقشاماۋدانىندا بولدى، مۇندا جالپى سانى 400-گە جۋىق تۇرعىن ءۇي قۇرىلىسى جۇرگىزىلۋدە. تەكسەرۋ بارىسىندا الداعى سۋىق مەزگىلدى ەسكەرە وتىرىپ، جۇمىس قارقىنى مەن تۇرعىن ءۇي ينفراقۇرىلىمىنىڭ قونىستانۋعا دايىندىعىن قامتاماسىز ەتۋ مەرزىمدەرى باعالاندى.
تەرەكتى اۋدانى پودستەپنوە اۋىلىندا 3 بولمەلى 106 تۇرعىن ءۇيدىڭ قۇرىلىسى ءجۇرىپ جاتىر. جۇمىس بيىلعى مامىر ايىندا باستالعان بولاتىن. بۇگىندە ىرگەتاسىن قۇيۋ جۇمىسى تولىعىمەن اياقتالدى، 43 ءۇيدىڭ قابىرعاسى تۇرعىزىلىپ جاتىر، 62 ءۇيدىڭ شاتىرى جابىلۋدا. نىساندارعا 8 مەردىگەر ۇيىم، شامامەن 330 ادام جانە 56 تەحنيكا جۇمىلدىرىلعان. تامىز ايىنىڭ ورتاسىندا پايدالانۋعا بەرۋ كوزدەلگەن.
دەركول كەنتىندە 103 تۇرعىن ءۇي جاڭا ۋچاسكەلەردە سالىنىپ جاتىر. قازىرگى ۋاقىتتا ىرگەتاس قۇيۋ جۇمىستارى تولىعىمەن اياقتالدى، 24 نىساندا ىشكى ارلەۋ جۇرگىزىلىپ جاتىر. وعان 5 مەردىگەر ۇيىم جۇمىلدىرىلدى. جۇمىس بيىلعى قىركۇيەك ايىندا اياقتالادى دەپ جوسپارلانعان.
ورال قالاسىنىڭ «جۇلدىز» ىقشاماۋدانىندا 191 نىسان جاڭا جەردە سالىنىپ جاتىر. تۇرعىن ۇيلەردى ۋاقىتىلى تاپسىرۋ ءۇشىن 17 مەردىگەر مەكەمە جۇمىسقا تارتىلدى. بۇگىنگى تاڭدا بارلىق ءۇيدىڭ ىرگەتاسى قۇيىلعان، 178 ءۇيدىڭ قابىرعاسى قالانۋدا، 49 نىساننىڭ شاتىرى جابىلىپ جاتىر.
پرەمەر- مينيستر سۋ تاسقىنىنان زارداپ شەككەن تۇرعىنداردى جاڭا باسپانامەن ۋاقىتىلى قامتاماسىز ەتۋ ءۇشىن جۇمىس بارىسىن قاتاڭ باقىلاۋ قاجەتتىگىن اتاپ ءوتتى.
«ءوڭىر قاجەتتى قارقىن الۋى كەرەك. ساپالى، قاۋىپسىز جانە جايلى تۇرعىن ۇيمەن قامتاماسىز ەتۋ مىندەتى - ۇكىمەتتىڭ نەگىزگى باسىمدىعى. بارلىق قۇرىلىس نىساندارىندا باقىلاۋدى كۇشەيتۋ قاجەت. وبلىستا باسپانالارىن كۇتىپ، ۋاقىتشا جەرلەردە تۇرىپ جاتقان وتباسىلار قاتارى كوپ. قۇرىلىس جۇمىستارىن جەدەلدەتىپ، 2-3 اۋىسىمدىق جۇمىس كەستەسىنە كوشۋ قاجەت. تولىق جۇمىلدىرۋدى قامتاماسىز ەتۋدى تاپسىرامىن»، - دەدى ولجاس بەكتەنوۆ.
سونىمەن قاتار ينجەنەرلىك جەلىلەردى، جول جانە الەۋمەتتىك ينفراقۇرىلىمدى قالپىنا كەلتىرۋ بويىنشا تاپسىرمالار بەرىلدى. سالىنىپ جاتقان اۋدانداردا ىلەسپە ينفراقۇرىلىم مەن اباتتاندىرۋدى الدىن الا قاراستىرۋ قاجەت. جاڭا تۇرعىن اۋدانداردىڭ جانىندا 1500 ورىنعا ارنالعان «جايلى مەكتەپتەردىڭ» قۇرىلىسى جۇرگىزىلۋدە. وبلىس اكىمدىگىنىڭ مالىمەتىنشە، جۇمىستار بيىلعى كۇزدە اياقتالادى.
انىقتاما: ۇكىمەت سۋ تاسقىنى سالدارىن جويۋ جانە زارداپ شەككەن ازاماتتارعا جان-جاقتى كومەك كورسەتۋ بويىنشا جۇمىستى جالعاستىرۋدا. 70 مىڭنان استام ادام ءوز ۇيلەرىنە ورالدى. زارداپ شەككەن ايماقتاردا تۇرعىن ۇيلەردىڭ %100- ى تەكسەرىلدى. جالپى سوماسى 44,2 ميلليارد تەڭگەگە 7823 وتباسى باسپاناسىن جوندەۋگە جانە قالپىنا كەلتىرۋگە وتەماقى الدى. 3987 وتباسى قيراعان باسپاناسىنىڭ ورنىنا جاڭا ءۇي مەن پاتەرلەرگە قونىستاندى. 2578 ءۇي سالىنىپ جاتىر. 34023 وتباسى 12,5 ميلليارد تەڭگەدەن استام سوماعا 100 ا ە ك مولشەرىندە ءبىرجولعى تولەم الدى. 20913 وتباسىنا جالپى سوماسى 9,5 ميلليارد تەڭگەگە 150 ا ە ك- كە دەيىنگى مولشەردە جوعالعان ءبىرىنشى قاجەتتىلىكتەگى زاتتارىن ساتىپ الۋ ءۇشىن قوسىمشا وتەماقى تولەندى. سۋعا كەتكەن مال ءۇشىن بەرىلگەن مەملەكەتتىك كومەك كولەمى 2,8 ميلليارد تەڭگەدەن استى. زارداپ شەككەن بيزنەسكە كەلتىرىلگەن زالالدى وتەۋ بويىنشا شوب سۋبەكتىلەرىنىڭ جالپى سوماسى شامامەن 1,5 ميلليارد تەڭگەگە 252 ءوتىنىمى قارالىپ، ماقۇلداندى.
اۆتور
ابىلايحان جۇماشيەۆ
