بەكتەنوۆ تاپسىرماسى: BI Group ،BAZIS تاعى باسقا كومپانيالار 17 ميلليارد تەڭگە سالىق تولەدى
استانا. KAZINFORM - مەملەكەتتىك كىرىستەر كوميتەتى كاسىپكەرلەرمەن ءوزارا ەسەپ ايىرىسۋ ارقىلى سالىق مىندەتتەمەلەرىن وڭتايلاندىرۋ باعىتىنداعى جۇمىستى جالعاستىرىپ جاتىر.
- تالداۋ قورىتىندىسى بويىنشا 633 سالىق تولەۋشىگە، ونىڭ ىشىندە 172 قۇرىلىس سالاسىندا (ءىرى قۇرىلىس كومپانيالارىن قوسا العاندا)، 102 ساۋدا جانە باسقا دا قىزمەت تۇرلەرىمەن اينالىساتىن كومپانيالارعا سالىق سالىناتىن كىرىستەرىن تومەندەتۋ بەلگىلەرى بويىنشا حابارلامالار جىبەرىلدى. 12- ناۋرىزداعى جاعداي بويىنشا سالىق تولەۋشىلەر قوسىمشا ەسەپتىلىك نىساندارىن تاپسىرىپ، سالىقتارىن تولىقتىرۋدا. قازىر 17 ميلليارد تەڭگە تولەندى، ونىڭ ىشىندە BI Group جانە BAZIS كومپانيالارى دا ءوز تولەمدەرىن جۇزەگە اسىردى، - دەلىنگەن قارجى مينيسترلىگى تاراتقان اقپاراتتا.
سونداي-اق ۆەدومستۆو قازىر دەرەكتەردى سالىستىرۋ جۇمىسى جالعاسىپ جاتقانىن حابارلادى.
- ءبىرقاتار ءىرى قۇرىلىس كومپانياسى قارجى اعىنىنىڭ اشىقتىعى مەن قۇرىلىس سالاسىنداعى كولەڭكەلى تۇستاردى جويۋ ءۇشىن سيفرلىق شەشىمدەردى ازىرلەۋگە جانە قارجىلاندىرۋعا باستاماشىلىق ءبىلدىرىپ جاتىر، - دەيدى مينيسترلىكتەن.
وسى ورايدا مەملەكەتتىك كىرىستەر كوميتەتى سالىق تولەۋشىلەردى سالىق زاڭناماسىنىڭ تالاپتارىن قاتاڭ ساقتاۋعا شاقىرادى.
- ەگەر حابارلاما ورىندالماعان جاعدايدا سالىق ورگاندارى كەشەندى سالىقتىق تەكسەرۋلەر جۇرگىزۋ تۋرالى باستاما كوتەرەدى، - دەپ ەسكەرتەدى.
ەسكە سالا كەتسەك، اقپاننىڭ سوڭىندا ۇكىمەت باسشىسى ولجاس بەكتەنوۆ كاسىپكەرلەردى ەكى اپتادا سالىق سوماسىن ادىلەتتى تۇردە تولەۋگە شاقىردى. ول تىزىمدە BI Group ،BAZIS جانە باسقا دا كوپتەگەن ءىرى قۇرىلىس كومپانياسى ءجۇر.
ارتىنشا قارجى مينيسترلىگى BI Group ،BAZIS- A كومپانيالارى كىرىسىن تومەندەتىپ كورسەتكەنىن حابارلادى.
سونداي-اق پرەمەر-ءمينيستردىڭ ورىنباسارى -ۇلتتىق ەكونوميكا ءمينيسترى سەرىك جۇمانعارين ۇكىمەت باسشىسى ولجاس بەكتەنوۆتىڭ سالىق ماسەلەسىنە ارنالعان جيىندا نەگە BI Group پەن BAZIS- ا كومپانيالارىنا شۇيلىككەنىن ءتۇسىندىردى.
اۆتور
داۋلەت ىزتىلەۋ
