بەكتەنوۆ سۋ تاسقىنىنان كەيىن ۇيلەردى قالپىنا كەلتىرۋ جايىندا: جەرگىلىكتى بيلىك جۇمىسىندا سالعىرتتىق بايقالادى

استانا. KAZINFORM - بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ سۋ تاسقىنىنان بۇلىنگەن ۇيلەردى بەلگىلەنگەن مەرزىمدە ءارى ساپالى سالۋدى تالاپ ەتتى.

Есеп берді
Фото: primeminister.kz

«مەن وتكەن اپتادا سولتۇستىك قازاقستان وبلىسىنا باردىم. جوندەۋ جانە قۇرىلىس جۇمىستارىنىڭ قارقىنى جاقسى. باسقا وڭىرلەر ءالى قاجەتتى قارقىندى الا الماي وتىر. تاعى دا ەسكە سالامىن - جاز مەزگىلى قىسقا، ءبارىن بەلگىلەنگەن مەرزىمدە، ءارى ساپالى ەتىپ جاساۋعا ءبىراز ۋاقىت تالاپ ەتىلەدى. وكىنىشكە وراي، جەرگىلىكتى بيلىك ورگاندارىنىڭ جۇمىسىندا سالعىرتتىق، شەشىم قابىلداۋدا باياۋلىق، ۇيىمداستىرۋ ىسىندە السىزدىك بايقالادى. اسىرەسە باتىس قازاقستان جانە اتىراۋ وبلىستارىنىڭ بەلسەندىلىگىن ارتتىرۋ قاجەت. مەرزىمدەردى مۇلدەم بۇزۋعا بولمايدى. ءبىراق تەك مەرزىم ەمەس، ساپا جاعى دا وتە ماڭىزدى. وعان دا ءجىتى نازار اۋدارۋ قاجەت»، - دەدى ۇكىمەت باسشىسى.

سونداي-اق، ولجاس بەكتەنوۆ كوپتەگەن وڭىردە سۋ تاسقىنىمەن كۇرەسۋ ءۇشىن قۇم مەن سازدان ۇيىندىلەر جاسالعانىن، توپىراق سالىنعان قاپتار پايدالانىلعانىن اتاپ ءوتتى.

«ەندىگى كەزەكتە اكىمدىكتەر ءبارىن وركەنيەتتى تۇرگە كەلتىرۋ كەرەك. ەكولوگياعا زيان كەلتىرمەس ءۇشىن بارلىق قاپشىقتاردى الىپ تاستاپ، كادەگە جاراتۋ قاجەت»، - دەدى پرەمەر- مينيستر.

اۆتور

مارلان جيەمباي

سوڭعى جاڭالىقتار