ەڭبەك پلاتفورماسىنا 44 تەگىن كۋرس قوسىلدى

استانا. قازاقپارات - 2024 -جىلدىڭ باسىنان باستاپ ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ قولداۋىمەن Skills Enbek پلاتفورماسىندا قازاق جانە ورىس تىلدەرىندەگى تەگىن كۋرستاردىڭ مازمۇنى كەڭەيتىلدى.

بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتى مالىمدەدى.

«ءار كۋرستىڭ ۇزاقتىعى 36 ساعاتتان اسادى. ونلاين وقىتۋ بەلگىلى ءبىر كاسىپتىك سالادا بەلگىلى ءبىر داعدىلاردى نەمەسە قوسىمشا قۇزىرەتتەردى الۋعا مۇمكىندىك بەرەدى»، - دەلىنگەن حابارلامادا.

وسىلايشا، قۇرىلىس جانە ءوندىرىس سالاسىندا «جىلۋ جەلىلەرىنىڭ جابدىقتارىنا، قۇبىرلارى مەن ارماتۋرالارىنا قىزمەت كورسەتۋ جانە جوندەۋ»، «سۋمەن جابدىقتاۋ جانە سۋ بۇرۋ جەلىلەرى مەن قۇرىلىستارىن پايدالانۋ»، «اۆاريالىق-قالپىنا كەلتىرۋ جۇمىستارىنىڭ سلەسارى»، «دانەكەرلەۋ ءوندىرىسىنىڭ نەگىزدەرى»، «توكارلىق وڭدەۋ نەگىزدەرى» سياقتى كۋرستار قوسىلدى.

«جەكە قىزمەتتەر مەن تاماقتانۋ بويىنشا قوسىمشا كۋرستار پايدا بولدى: «تىگۋدى باسىنان باستاپ ۇيرەنىڭىز!»، «قىزمەت كورسەتۋ سالاسىنداعى اكىمشى»، «شاشتاراز ونەرى»، «اسپاز»، «ناۋبايحانا نەگىزدەرى»، «كونديتەرلىك شەبەرحانا». «مۇگەدەكتىگى بار ادامدارعا كۇتىم جاسايتىن قىزمەتكەر» كۋرسى بار» ، - دەپ حابارلادى ۆەدومستۆونىڭ باسپا ءسوز قىزمەتى.

سونداي- اق، «ءتيىمدى كوممۋنيكاتسيالار جانە كوماندالىق جۇمىس»، «سىني ويلاۋ نەگىزدەرى»، «ۋاقىتتى باسقارۋ جانە باسىمدىق بەرۋ»، «ديزاين ويلاۋ»، «بيزنەس-پروتسەستەردى باسقارۋ»، «بيزنەستەگى كوممۋنيكاتسيا مادەنيەتى»، «Agile پرينتسيپى بويىنشا جوبالاردى باسقارۋ»، «ماركەتينگتىك تالداۋ (كونسالتينگ) »، «Microsoft Office-پەن جۇمىس» جانە «ەكولوگيالىق ويلاۋ داعدىلارىن قالىپتاستىرۋ» سياقتى ءار ماماندىق ءۇشىن بىردەي ماڭىزدى «يكەمدى» داعدىلارعا باعىتتالعان كۋرستار بار.

ءمالىم بولعانداي، كۋرستان وتكەنىن راستايتىن سەرتيفيكات Enbek.kz جۇمىسقا ورنالاستىرۋ پورتالىندا الىنعان بارلىق داعدىلاردى كورسەتە وتىرىپ، تۇيىندەمەدە اۆتوماتتى تۇردە كورسەتىلەدى.

كۋرستاردا Google Play جانە App Store-دان جۇكتەپ الۋعا بولاتىن Enbek موبيلدى قوسىمشاسىندا قول جەتىمدى.

ەستەرىڭىزگە سالا كەتەيىك، Soyle.kz مەملەكەتتىك ءتىلدى وقىتۋ پورتالىن قۇرعان مەملەكەتتىك ءتىل قورى تاعى ءبىر سەرىكتەس. قازىر Skills Enbek پلاتفورماسىندا «Как выучить казахский язык с нуля» پرومو- كۋرسى قولجەتىمدى.

اتالعان پلاتفورمادا ءارتۇرلى باعىتتار بويىنشا بارلىعى 477 كۋرس ورنالاستىرىلعان، ونىڭ ىشىندە 243- ءى تەگىن. تىركەلگەن پايدالانۋشىلار سانى 380 مىڭ ادامعا جەتكەن.

اۆتور

باقىتگۇل اباي قىزى