بازارلاردى جاڭعىرتۋعا قارجى قايدان الىنادى - ساۋدا كوميتەتىنىڭ جاۋابى
استانا. KAZINFORM - بيىل ەلىمىزدە 100 بازار جاڭارتىلادى، ول ءۇشىن 5,9 ميلليارد تەڭگە ءبولىندى. بازارلاردى جاڭارتۋ جۇمىستارى تۋرالى تولىعىراق ساۋدا جانە ينتەگراتسيا مينيسترلىگى ساۋدا كوميتەتىنىڭ ءتوراعاسى ايدار ابىلدابەكوۆ ايتىپ بەردى.
- بازار يەسى بانكتەن نەسيە الادى، نەسيە العان كەزدە ۇكىمەتتىڭ قولداۋىن العىم كەلەدى دەپ نيەت بىلدىرەسىز. سول كەزدە ەكىنشى دەڭگەيلى بانك «دامۋ» قورىمەن بايلانىسىپ، ءسىزدىڭ اتىڭىزدان ۇسىنىم بەرەدى، ودان ءارى «دامۋ» قورى قارايدى، - دەدى ايدار ابىلدابەكوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ساۋدا كوميتەتى باسشىسىنىڭ ايتۋىنشا، بيىل بازارلاردى جاڭعىرتۋعا 5,9 ميلليارد تەڭگە ءبولىندى.
- الايدا، قاراجات ءالى تۇسپەدى، ناۋرىزدا ءتۇسۋى كەرەك، سودان سوڭ قولداۋ كورسەتىلەدى باستايدى، - دەپ قىسقا قايىردى سپيكەر.
سونداي-اق ب ا ق وكىلدەرى ساۋدا مينيسترلىگىنىڭ وكىلىنە بازارلار جاڭعىرتىلعان سوڭ، ساۋدا ورىندارىن جالعا الۋ قۇنى قىمباتتاپ، ونىڭ اسەرى ازىق-تۇلىك باعاسىنىڭ وسۋىنە الىپ كەلمەي مە دەگەن ساۋال قويدى.
- جالپى جاڭعىرتۋدان وتەتىن بارلىق بازارعا قولداۋ كورسەتىلەدى. ساۋدا ورىندارىن جالعا الۋ قۇنى بازار يەسىنە بايلانىستى، ەگەر ول قارجىلاي شىعىنعا كەلىپ، ونى وتەيمىن دەسە ءوزىنىڭ قۇزىرىندا. ونىڭ ىسىنە ءبىز ارالاسا المايمىز. ال ازىق-تۇلىك باعاسىنىڭ وسۋىنە قاتىستى ناقتى ايتا المايمىن، ول نارىقپەن رەتتەلەدى، - دەيدى ساۋدا كوميتەتىنىڭ ءتوراعاسى.
ايتا كەتەيىك، بيىل ەلىمىزدە 100 بازار جاڭارتىلادى. الدىمەن ساۋدا جانە ينتەگراتسيا مينيسترلىگىنىڭ وكىلدەرى بارلىق بازاردى ارالاپ، تەكسەرىپ شىعادى.
سونىمەن قاتار 2026 -جىلدان باستاپ ۋاقتىلى جاڭارتىلماعان بازار يەلەرىنە ايىپپۇل سالىنا باستايدى.
ەسكە سالا كەتسەك، جىل باسىندا ۇكىمەت باسشىسى بۇكىل ساۋدا قىزمەتىن، ونىڭ ىشىندە بازارلار مەن ءۇي ماڭىنداعى شاعىن دۇكەندەردىڭ قىزمەتىن سيفرلاندىرۋ بويىنشا ناقتى ۇسىنىستار مەن شارالار ازىرلەۋ كەرەكتىگىن ايتقان ەدى.
اۆتور
داۋلەت ىزتىلەۋ
