بايدەن نەتانياحۋدىڭ گازا سەكتورىنداعى ارەكەتىن سىنعا الدى

استانا. KAZINFORM – ا ق ش پرەزيدەنتى دجو بايدەن 9-ناۋرىزدا امەريكالىق MSNBC تەلەارناسىنا بەرگەن سۇحباتىندا يزرايلدىڭ گازا سەكتورىنداعى جازىقسىز ادامداردىڭ ولىمىنە اكەلگەن ارەكەتىن قاتەلىك دەپ سانايتىنىن ايتتى. ول ءسوز اراسىندا اتىستى توقتاتۋعا شاقىردى. بۇل تۋرالى DW جازدى.

«يزرايل پرەمەر-ءمينيسترى بينيامين نەتانياحۋ ءوز ەلىن قورعاۋعا قۇقىلى، ءبىراق يزرايل مەملەكەتىنىڭ گازا سەكتورىندا حاماس لاڭكەستىك ۇيىمىنا قارسى سوعىسى كەزىندە جازىقسىز ادامداردىڭ ءومىرىن قورعاۋ ءۇشىن كوبىرەك ارەكەت ەتۋى كەرەك»، - دەدى بايدەن.

ا ق ش پرەزيدەنتى 1,5 ميلليونعا جۋىق پالەستينالىق بوسقىندار پانا تاپقان رافاح قالاسىنا يزرايل قورعانىس ارمياسىنىڭ (IDF) شابۋىل جاساۋ مۇمكىندىگى تۋرالى ايتا وتىرىپ، بۇل قادامنىڭ ورەسكەل قادام ەكەنىن اتاپ ءوتتى.

تاياۋ شىعىستاعى قاقتىعىستىڭ شيەلەنىسۋى 2023-جىلدىڭ 7-قازانىندا ەۋروپالىق وداق پەن ا ق ش تەرروريستىك ۇيىم دەپ تانىعان حاماس راديكالدى يسلامدىق قوزعالىسى يزرايلگە كەڭ اۋقىمدى شابۋىل جاساعاننان كەيىن باستالدى. تەرروريستەر يزرايلگە جاپپاي زىمىران شابۋىلىن جاسادى جانە 1400 ادام سول شابۋىلدىڭ قۇربانى بولدى. سونداي-اق سودىرلار 200-دەن استام ادامدى كەپىلگە الىپ، گازا سەكتورىنا الىپ كەتكەن.

يزرايل جاۋاپ رەتىندە حاماس-قا سوعىس جاريالادى. ەل ارمياسى حاماس بيلىگىندەگى وسى تىعىز قونىستانعان پالەستينا ايماعىنا جاپپاي سوققى بەرىپ، قۇرلىقتاعى اسكەري وپەراتسيانى دا جۇرگىزۋدە. حاماس باقىلاۋىنداعى دەنساۋلىق ساقتاۋ مينيسترلىگىنىڭ مالىمەتىنشە، گازا سەكتورىندا قازىردىڭ وزىندە 30 مىڭعا جۋىق ادام قازا تاپقان.

اۆتور

ەركەجان سماعۇلوۆا