باياناۋىلدا دەمالىپ جۇرگەن تۋريستەر سيرەك وسىمدىكتەردى جۇلعان

پاۆلودار. KAZINFORM - تاۋلى ولكەگە تىنىستاپ كەلگەندەر جارتاستار ماڭىندا سيرەك كەزدەسەتىن قىرىققۇلاق (پاپورتنيك) وسىمدىگىن جۇلىپ العان. ۇلتتىق تابيعي پاركتىڭ قىزمەتكەرلەرى پوليتسەيلەرمەن بىرلەسىپ، دەمالۋشىلار اراسىندا پروفيلاكتيكالىق اڭگىمە جۇرگىزدى.

بۇل تۋرالى ۇلتتىق پاركتىڭ ماماندارى حابارلادى.

باياناۋىل مەملەكەتتىك ۇلتتىق تابيعي پاركىنىڭ باسشىلىعى تۋريستەردەن سيرەك كەزدەسەتىن وسىمدىكتەرگە تيىسپەۋدى سۇراپ وتىر.

تاۋ ارالاپ، قىزىق ىزدەگەندەر قىرىققۇلاق وسىمدىگىن جۇلىپ تاستاعانى تۋرالى فاكتى تىركەلگەن.

پارك ماماندارى اۋداندىق پوليتسيا ءبولىمىنىڭ قىزمەتكەرلەرىمەن بىرلەسىپ، دەمالۋشىلار اراسىندا ءتۇسىندىرۋ جۇمىستارىن جۇرگىزدى.

بۇعان دەمالۋشىلاردىڭ ىشىندە سيرەك كەزدەسەتىن وسىمدىكتى جۇلىپ العان جاعداي سەبەپ بولعان.

ق ر اكىمشىلىك قۇقىق بۇزۋشىلىق تۋرالى كودەكستىڭ 378 بابىندا: «وسىمدىكتەر وسەتىن جەرلەر مەن جانۋارلاردىڭ مەكەندەۋ ورتاسىن قورعاۋ قاعيدالارىن، جانۋارلاردىڭ كوبەيۋ جاعدايلارىن، ءورىس اۋدارۋ جولدارى مەن شوعىرلانۋ ورىندارىن، زوولوگيالىق جانە بوتانيكالىق كوللەكتسيالاردى جاساۋ، ساقتاۋ، ەسەپكە الۋ مەن پايدالانۋ قاعيدالارىن بۇزۋ، سول سياقتى جانۋارلار تۇرلەرىن زاڭسىز قونىس اۋدارتۋ، ينترودۋكتسيالاۋ، رەينترودۋكتسيالاۋ جانە بۋدانداستىرۋ - ەسكەرتۋ جاساۋعا نەمەسە جەكە تۇلعالارعا - سەگىز، لاۋازىمدى ادامدارعا، شاعىن كاسىپكەرلىك سۋبەكتىلەرىنە نەمەسە كوممەرتسيالىق ەمەس ۇيىمدارعا - ون ءتورت، ورتا كاسىپكەرلىك سۋبەكتىلەرىنە - جيىرما، ىرى كاسىپكەرلىك سۋبەكتىلەرىنە الپىس ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى»، - دەپ كورسەتىلگەن.

ءتارتىپ ساقشىلارى دەمالىس ايماعىنداعى «بەرەزكا» دەمالىس ءۇيىنىڭ باسشىلىعىنا اتالعان وقيعا بويىنشا ەسكەرتۋ جاسادى.

ەگەر دەمالۋشىلار اراسىندا ورەسكەل جاعداي تاعى قايتالاناتىن بولسا، كاسىپكەرلىك سۋبەكتىسىنە ايىپپۇل سالىنادى.

ەسكە سالا كەتەيىك، باياناۋىلدا ءبىر دەمدە 5 مىڭ ادام دەمالا الاتىن 50-دەن اسا تۋريستىك نىسان بار.

اۆتور

مۇرات اياعان