باتىس قازاقستاندا وزەننەن 300-دەن استام كيىكتىڭ ولەكسەسى شىعارىلدى
\ورال. KAZINFORM - باتىس قازاقستان وبلىسى كازتالوۆ اۋدانى اۋماعىندا سارىوزەندە ولگەن كيىكتەن تازارتۋ جۇمىستارى جۇرگىزىلدى.
ب ق و ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باسشىسى نۇرلان راحىمجانوۆتىڭ ءمالىم ەتكەنىندەي، كەشە سارى وزەندە كيىك ولەكسەلەرى قالقىپ جۇرگەنى جونىندە حابار تۇسكەننەن كەيىن وقيعا ورنىنا «بوكەيوردا» تابيعي رەزەرۆاتىنىڭ قىزمەتكەرلەرى اۆتوكولىكتەرىمەن باردى.
- ولار قاراوبا اۋىلدىق وكرۋگ اكىمدىگى جانە اۋداندىق ت ج ءبولىمىنىڭ قىزمەتكەرلەرىمەن بىرگە وزەننەن 308 كيىك ولەكسەسىن الىپ شىقتى. بۇلاردىڭ بارلىعى دا - اقبوكەننىڭ بيىلعى تولدەرى. بيىكتىگى 40-50 سانتيمەتردەي جىرادان شىعا الماي قالعان. سودان كەيىن كيىك ولەكسەلەرى اۋىلدىق وكرۋگتەگى مال مولاسىندا الگوريتمگە ساي ورتەۋ ادىسىمەن جويىلىپ، حاتتاما تولتىرىلدى، - دەدى ن. راحىمجانوۆ.
ينسپەكسيا باسشىسى وسى تۇستا كەزەكشىلىك نەگە قويىلمايدى دەگەن اڭگىمەنىڭ بار ەكەندىگىن جەتكىزدى. ونىڭ ايتۋىنشا، كيىك ءبىر عانا جەردەن وتپەيدى، وزەننىڭ بارلىق بويىندا كەزەكشىلىك قويۋ مۇمكىن ەمەس. ەكىنشىدەن، ونشاقتى كۇننەن كەيىن كيىكتىڭ قۇرالايلارى وسكەننەن سوڭ سۋدان وتە بەرەتىن بولادى.
ەسكە سالا كەتەيىك، بۇدان بۇرىن باتىس قازاقستاندا سۋعا باتقان 560-تان استام كيىك ولەكسەسى جويىلعانىن جازعان بولاتىنبىز.
اۆتور
عايساعالي سەيتاق
