باتىس قازاقستاندا كيىكتى ۇستاپ، ەتىن حالىققا ساتۋعا رۇقسات ەتىلدى

باتىس قازاقستان وبلىسىندا ەكى كاسىپورىن كيىك ەتىن ساتۋمەن زاڭدى تۇردە اينالىساتىن بولادى، دەپ حابارلايدى قازاقپارات ءتىلشىسى.

ب ق و ورمان شارۋاشىلىعى جانە جانۋارلار دۇنيەسىن قورعاۋ اۋماقتىق ينسپەكتسياسىنىڭ باسشىسى نۇرلان راحىمجانوۆتىڭ ايتۋىنشا، جاڭاقالا اۋدانىندا "ىزدەنىس" ج ش س، اقجايىقتا "باتىس- ن ى ق" ج ش س كيىك ەتىن حالىققا ساتۋمەن اينالىسادى.

نۇرلان راحىمجانوۆتىڭ سوزىنە قاراعاندا، جاڭگىر حان اتىنداعى باتىس قازاقستان اگرارلىق- تەحنيكالىق ۋنيۆەرسيتەتى دايىنداعان بيولوگيالىق نەگىزدەمەگە سايكەس وڭىردە كيىكتىڭ سانى 500-550 مىڭ باستان اسپاۋى كەرەك.

قازىرگى تاڭدا ولاردىڭ سانى شامامەن 1 ميلليون 800 مىڭ باستى قۇراپ وتىر.

كيىكتەردىڭ كوبەيۋى شابىندىققا، جايىلىمدارعا، ەگىستىكتەرگە زيان كەلتىرۋمەن قاتار، ەپيدەميالىق جاعدايعا دا كەرى اسەرىن تيگىزۋى ىقتيمال. سوندىقتان كيىك سانىن رەتتەۋ ءۇشىن ءبىرقاتار ازىرلىك جۇمىستارى جۇرگىزىلىپ جاتىر. وسىعان وراي ق ر ەكولوگيا جانە تابيعي رەسۋرستار مينيسترلىگىنىڭ 19 -قىركۇيەكتە كيىكتەردى رەتتەلۋگە جاتاتىن جانۋارلاردىڭ قاتارىنا ەنگىزۋ جونىندە بۇيرىعى شىققانى بەلگىلى.

"كۇنى بۇگىن "وحوتزووپروم" مەكەمەسى اڭشىلارمەن كەلىسىمشارتتار جاساپ جاتىر. كيىك سانىن رەتتەۋ جۇمىستارى تەك قانا كورال (تور) ارقىلى جۇرگىزىلەتىن بولادى. ياعني اتپايدى، تورعا قاماپ، ۇستايدى. بۇل جۇمىستار قازان ايىنىڭ العاشقى ونكۇندىگىندە باستالادى دەپ جوسپارلانعان"، - دەدى قازاقپارات تىلشىسىنە ن. راحىمجانوۆ.

ەسكە سالا كەتەيىك، بۇدان بۇرىن باتىس قازاقستان وبلىسىندا كيىكتەن 1 مىڭنان استام شارۋاشىلىققا زالال كەلگەنىن جازعان بولاتىنبىز.