باتىس قازاقستاندا جەڭىس كۇنىنە وراي 14 مايدانگەرگە 1,5 ميلليون تەڭگەدەن بەرىلمەك
ورال. KAZINFORM - باتىس قازاقستان وبلىسىندا بيىلعى جەڭىس كۇنىنە وراي 4828 ادامعا 341,2 ميلليون تەڭگە كولەمىندە ءبىرجولعى الەۋمەتتىك كومەك قاراستىرىلدى.
ب ق و جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ءدىلداش يسقاقوۆانىڭ ءمالىم ەتكەنىندەي، جىل سايىنعى ءداستۇرلى كومەك اۋداندىق جانە قالالىق ءماسليحاتتاردىڭ شەشىمدەرىمەن بەكىتىلگەن «الەۋمەتتىك كومەك كورسەتۋ، ونىڭ مولشەرلەرىن بەلگىلەۋ جانە مۇقتاج ازاماتتاردىڭ جەكەلەگەن ساناتتارىنىڭ تىزبەسىن ايقىنداۋ قاعيدالارىنا» سايكەس بەلگىلەندى.
ءدىلداش سالاۋات قىزىنىڭ سوزىنە قاراعاندا، 2667 الۋشىعا، سونىڭ ىشىندە ەكىنشى دۇنيەجۇزىلىك سوعىس ارداگەرلەرى مەن سولارعا تەڭەستىرىلگەن ادامدارعا 151,2 ميلليون تەڭگە جاردەم بەرىلەدى.
اتاپ ايتقاندا، 14 مايدانگەرگە - 1,5 ميلليون تەڭگەدەن، لەنينگرااد قالاسىن قورشاۋ كەزەڭىندە جۇمىس ىستەگەن 2 ادامعا جانە فاشيستىك لاگەردىڭ 6 تۇتقىنىنا - 120 مىڭ تەڭگەدەن، قايتىس بولعان سوعىس ارداگەرلەرى مەن سولارعا تەڭەستىرىلگەندەردىڭ ايەلدەرىنە (151 ادام) - 30 مىڭ تەڭگەدەن، 2494 تىل ەڭبەككەرىنە 50 مىڭ تەڭگەدەن تولەنەدى.
باسقارما باسشىسى ورىنباسارىنىڭ ايتۋىنشا، 2161 الۋشىعا، سونىڭ ىشىندە «ارداگەرلەر تۋرالى» زاڭىنا سايكەس باسقا ساناتتاعى ازاماتتارعا 190 ميلليون تەڭگە ءبولىندى. ايتالىق، اۋعانستان ۇرىس قيمىلدارىنىڭ 628 ارداگەرى - 80 مىڭ تەڭگەدەن (ءبىرىنشى تولەمدەرى 15-اقپاندا 100 مىڭ تەڭگە كولەمىندە بەرىلدى)، تاجىك-اۋعان ۋچاسكەسىندە، تاۋلى قاراباقتا جانە يراكتا بولعان 683 اسكەري قىزمەتشى 100 مىڭ تەڭگەدەن الماق.
بۇدان بولەك، چەرنوبىل اتوم-ەلەكتر ستانساسىنداعى اپات سالدارىن جويۋعا قاتىسقاندار مەن سولاردىڭ ىشىندە مۇگەدەكتىك تاعايىندالعاندارعا - 100 مىڭ تەڭگەدەن، قايتىس بولعان مۇگەدەكتەردىڭ وتباسىلارىنا 60 مىڭ تەڭگەدەن (بارلىعى - 381 ادام) قارالدى. سونداي-اق سەمەي يادرولىق پوليگونىنداعى سىناق سالدارىنان مۇگەدەك بولعان 213 ادامعا - 100 مىڭ تەڭگەدەن، بەيبىت كەزدە قازا تاپقاندار وتباسىلارىنا (198 ادام) - 60 مىڭ تەڭگەدەن، ك س ر و- نى قورعاۋ كەزىندە جارالانۋى سالدارىنان مۇگەدەكتىك بەلگىلەنگەن 52 اسكەري قىزمەتشىگە 100 مىڭگەدەن كومەك بەرىلەدى.
«اتاۋلى كۇندەر مەن مەرەكە كۇندەرىنە وراي الەۋمەتتىك كومەك الۋشىلاردان وتىنىشتەر تالاپ ەتىلمەيدى. جاردەم ۋاكىلەتتى ۇيىمنىڭ تىزىمدەرى نەگىزىندە كورسەتىلەدى. تولەمدەر 1-مامىرعا دەيىن تولىقتاي جۇرگىزىلەتىن بولادى»، دەدى د. يسقاقوۆا.
اۆتور
عايساعالي سەيتاق
