باتىس قازاقستان وبلىسىندا تۇرعىندار قارجى پيراميداسىنا 700 ميلليون تەڭگە سالعان
ورال. KAZINFORM - باتىس قازاقستان وبلىسىندا قارجى پيراميداسىن ۇيىمداستىرۋ بويىنشا تىركەلەتىن قىلمىستىق ىستەر سانى ارتىپ وتىر.
ب ق و بويىنشا ەكونوميكالىق تەرگەپ-تەكسەرۋ دەپارتامەنتى باسشىسىنىڭ ورىنباسارى نۇربول احمەتوۆتىڭ وڭىرلىك كوممۋنيكاتسيالار قىزمەتى الاڭىندا وتكەن بريفينگتە ءمالىم ەتكەنىندەي، وڭىردە قارجى پيراميداسىنا قاراجات سالىپ، تابىس تابامىن دەپ وپىق جەپ قالعان ازاماتتار سانى ازايار ەمەس.
نۇربول جولداس ۇلىنىڭ سوزىنە قاراعاندا، سوڭعى ءۇش جىلدا ق ر ق ك 217-بابى بويىنشا قارجى پيراميداسىن قۇرىپ، وعان باسشىلىق ەتۋدىڭ 14 دەرەگى تىركەلگەن. وسى پيراميدالارعا 3 مىڭنان استام سالىمشى قاتىسقان.
«مىسالى، بيىل جاڭا ينۆەستورلاردان تارتىلعان قاراجات ەسەبىنەن جوعارى اقى تولەنەتىن تابىسقا سايكەس قىزمەت كورسەتەمىن دەگەن جەلەۋمەن «World Money» ءوزارا كومەك قورى» اتتى قارجى پيراميداسىن قۇرىپ، ونىڭ قىزمەتىن باسقارعان ب. ابدۋعاليەۆكە قاتىستى قىلمىستىق ءىس مارەسىنە جەتتى. سوتقا دەيىنگى تەرگەپ-تەكسەرۋ بارىسىندا وسى قارجى پيراميداسىنا 99 سالىمشىنىڭ 13 ميلليون 575,2 مىڭ تەڭگە كولەمىندە قاراجات سالىپ، سونىڭ ىشىندە 30 ازاماتقا 2 ميلليون 601,3 تەڭگە مۇلىكتىك زالال كەلتىرىلگەنى انىقتالدى. ابدۋعاليەۆ سوت ۇكىمىمەن كىنالى دەپ تانىلىپ، وعان 3 جىل 6 ايعا باس بوستاندىعىن شەكتەۋ جازاسى كەسىلدى. سونداي-اق قارجىلىق جانە كوممەرتسيالىق ۇيىمداردا باسشىلىق لاۋازىمداردى اتقارۋ قۇقىعىنان ايىرىلدى»، دەيدى ن. احمەتوۆ.
ونىڭ ايتۋىنشا، جۋىردا «Life is Good» قارجى پيراميداسىنا قاتىستى قىلمىستىق ءىس بويىنشا سوتتىڭ ايىپتاۋ ۇكىمى شىقتى.
وسى ءىستىڭ اياسىندا قىلمىستىق جولمەن، ياعني اتالعان پيراميدادان الىنعان اقشانى زاڭداستىرۋ بويىنشا ەپيزود انىقتالىپ، سوت ۇكىمى بويىنشا قىلمىسكەرگە قوسىمشا ايىپ تاعىلدى.
بۇدان بولەك، «Chia Tai Pharmaceutical» قارجى پيراميداسىنىڭ قۇرىلىمدىق بولىمشەلەرىن ۇيىمداستىرۋ دەرەگى بويىنشا 2 قىلمىستىق ىسكە نۇكتە قويىلدى. سالىمشىلاردىڭ قارجىسى شەتەلدەگى فارماتسيەۆتيكالىق جانە ەنەرگيا كوزىن ءوندىرۋ كومپانيالارىنا ينۆەستيتسيا ەسەبىندە تارتىلعان.
«وبلىستا تابىسى از، ءبىلىم، دەنساۋلىق ساقتاۋ سالاسىندا جۇمىس ىستەيتىندەر، زەينەتكەرلەر، باسقا دا حالىقتىڭ الەۋمەتتىك از قامتىلعان توبىنا جاتاتىندار اتالعان پيراميدانىڭ قۇربانىنا اينالىپ وتىر. سالىمشىلاردىڭ جالپى سانى 600 دەن اسادى. ولار 700 ميلليون استام تەڭگە سالعان. ال «Qnet» جانە «Granat» قارجى پيراميدالارى بويىنشا قىلمىستىق ءىس اياقتالعان. بۇلاردا جابىرلەنۋشىلەرگە كەلتىرىلگەن زالال وتەلگەن. قارجى پيراميدالارىنا قارسى تۇرۋ باعىتىندا ءىس- شارالار جۇرگىزىلىپ كەلەدى. ايتالىق، 286 سايت، WhatsApp مەسسەندجەرىندە 2097 قاتىسۋشىسى بار 6 توپ بۇعاتتالدى. 15 كوللەدجدە قارجىلىق ساۋاتتىلىقتى ارتتىرۋ ماقساتىندا دارىستەر وقىلدى»، دەيدى ن. احمەتوۆ.
اۆتور
عايساعالي سەيتاق
