باستاۋىش سىنىپتا ب ج ب مەن ت ج ب نەلىكتەن الىنىپ تاستالدى
استانا. KAZINFORM - جاڭا وقۋ جىلىنان باستاپ 1-4 -سىنىپ وقۋشىلارىنىڭ ءبىلىمىن باعالاۋ جۇيەسى وزگەرەدى. 1- قىركۇيەكتەن باستاپ باستاۋىش سىنىپتاردا بۇرىنعى فورماتتاعى ب ج ب مەن ت ج ب قولدانىلمايدى. ونىڭ ورنىنا وقۋ ماقساتتارىنا سايكەس جەڭىلدەتىلگەن باقىلاۋ جۇمىستارى ەنگىزىلەدى. بۇل وزگەرىستىڭ نەگىزگى سەبەبىن Jibek Joly تەلەارناسىندا استانا قالاسى ءبىلىم باسقارماسى ادىستەمەلىك ورتالىعىنىڭ ادىسكەرى اقمارال بولات قىزى ايتتى.
- زەرتتەۋ بارىسىندا بالالاردىڭ ەموتسيونالدىق جانە فيزيكالىق تۇرعىدان دا جۇكتەمەسى بايقالدى. مۇعالىمدەر تاراپىنان دا ب ج ب مەن ت ج ب ارتىق جۇكتەمە ەكەنى ايتىلدى. سول سەبەپتى باقىلاۋ جانە ارالىق باقىلاۋ جۇمىستارى جەڭىلدەتىلگەن فورماتتا ەنگىزىلىپ وتىر، - دەدى اقمارال بولات قىزى.
ماماننىڭ ايتۋىنشا، بۇل باستاۋىش سىنىپتاردا باقىلاۋ جۇمىستارى مۇلدە بولمايدى دەگەن ءسوز ەمەس. وقۋشىلاردىڭ ءبىلىمى بۇرىنعىداي وقۋ باعدارلاماسى مەن وقۋ ماقساتتارىنا سايكەس باعالانادى. تەك تاپسىرمالاردىڭ فورماتى جەڭىلدەتىلەدى.
- تولىعىمەن بۇرىنعى فورماتتان باس تارتتىق دەپ ايتا المايمىز. باعدارلاماعا جانە وقۋ ماقساتتارىنا ساي باقىلاۋ جۇمىستارى جاسالادى. قازىر ولاردىڭ ۇلگىلەرى ازىرلەنىپ، تالاپتارى قۇرىلىپ جاتىر. ءبىراق بۇرىنعىعا قاراعاندا جەڭىلدەتىلگەن فورماتتا ەنگىزىلەدى، - دەدى ول.
جاڭا جۇيەدە باقىلاۋ جۇمىستارىنىڭ باعالارى ەلەكتروندى جۋرنالعا ەنگىزىلەدى. مەكتەپكە قاراي بۇل «كۇندەلىك» نەمەسە «ءبىلىم Al» جۇيەسى بولۋى مۇمكىن. وقۋشىنىڭ كۇندەلىكتى ساباق بارىسىندا العان باعالارى مەن باقىلاۋ جۇمىستارىنىڭ ناتيجەسى نەگىزىندە قورىتىندى باعا اۆتوماتتى تۇردە شىعارىلادى.
ادىسكەردىڭ سوزىنشە، باقىلاۋ جۇمىستارىنىڭ بۇرىنعىداي بىرنەشە پاراقتان تۇراتىن كۇردەلى فورماتتا بولۋى مىندەتتى ەمەس. وقۋشىلار كەي تاپسىرمالاردى تىكەلەي داپتەرگە ورىنداۋعا مۇمكىندىك الادى.
- بۇرىن ديكتانت، مازمۇنداما سياقتى جۇمىستاردى ورىنداۋ فورماتى بولعان. مۇنداي تاپسىرمالاردى بالاعا ورىنداۋ الدەقايدا جەڭىل. ونىڭ وزىنە دەگەن سەنىمى دە ارتادى. سوندىقتان ەموسيونالدىق تۇرعىدان وقۋشىعا ۇلكەن جۇكتەمە تۇسپەيدى. مۇعالىمدەردىڭ ساعات سانى وزگەرمەيدى، ءبىراق جۇمىس كولەمى ازايادى. بۇرىن ب ج ب مەن ت ج ب ءۇشىن ءار بالاعا بىرنەشە پاراق تاپسىرما شىعارىپ، كۇردەلى باعالاۋ تالاپتارىن قولدانۋ كەرەك ەدى. قازىر ونىڭ ءبارى جەڭىلدەتىلىپ، بالالار باقىلاۋ جۇمىستارىن داپتەرگە ورىنداۋعا مۇمكىندىك الىپ وتىر، - دەپ تۇيىندەدى اقمارال بولات قىزى.
ايتا كەتەيىك، بۇعان دەيىن بالانىڭ مەكتەپكە دايىندىعىنا قاتىستى پسيحولوگ كەڭەسىن جازعان ەدىك.
