باسپانا ساتىپ الۋ مامىلەلەرىن ونلاين جاساۋعا مۇمكىندىك تۋادى
استانا. KAZINFORM - تاياۋ ۋاقىتتا «Enotary» پلاتفورماسىندا جىلجىمايتىن مۇلىكتى ساتۋ مامىلەلەرىن ونلاين جاساۋعا مۇمكىندىك تۋادى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ادىلەت ۆيتسە-ءمينيسترى بەكبولات مولدابەكوۆ ءمالىم ەتتى.
- نوتاريالدىق ونلاين- مامىلە ىسكە قوسامىز. تاياۋ ۋاقىتتا قۇلاقتاندىرۋ بولادى. وزدەرىڭىز بىلەتىندەي، بۇرىنىراق ءبىز «Enotary» جوباسىن ىسكە قوسقان ەدىك. ياعني، الەمنىڭ كەز كەلگەن نۇكتەسىنەن تەلەفون ارقىلى نوتاريۋسقا ۆيدەوقوڭىراۋ شالا الاسىز، وعان بارىپ سەنىمحات راسىمدەۋدىڭ قاجەتى جوق. ەكى جىلعا جۋىق ۋاقىت سىناقتان وتكىزدىك، قارادىق، ەشقانداي كەيىستىك، پروبلەما بولمادى. ازاماتتاردان شاعىم تۇسپەدى. سوعان وراي ەندىگى ۋاقىتتا اتالعان پلاتفورماعا جىلجىمايتىن مۇلىكتى ساتۋدى دا قوسقىمىز كەلەدى. بۇعان قوسا بۇل ونلاين يپوتەكا دا. ەگەر ءسىز ونلاين يپوتەكا راسىمدەسەڭىز، وندا بانككە 10-15 رەت بارۋدىڭ قاجەتى بولمايدى. بۇل جۇمىستى نوتاريۋسقا ۆيدەوقوڭىراۋ شالۋ ارقىلى ورىنداي الاسىز. ارينە، نوتاريۋس ءبارىن قايتا تەكسەرەدى. سونىمەن قاتار ءسىز بيومەتريادان وتەسىز. تەلەفونىڭىزعا س م س كەلەدى. دەمەك، قاۋىپسىزدىكتىڭ 3-4 كەزەڭى بار، پلاتفورما تولىقتاي قاۋىپسىز، - دەدى بەكبولات مولدابەكوۆ.
ونىڭ اتاپ وتۋىنشە، 2023 -جىلدىڭ ساۋىرىنەن سەنىمحات، كومەك جانە ەرلى-زايىپتىلاردىڭ كەلىسىمى سىندى نوتاريالدىق قىزمەتتەر ونلاين فورماتقا كوشىرىلگەن. جوبا ىسكە قوسىلعان ساتتەن بەرى 220 مىڭنان استام سيفرلىق سەنىمحات راسىمدەلدى جانە اتالعان قىزمەتتەرگە ازاماتتار تاراپىنان ەشقانداي شاعىم بولعان جوق.
ەسكە سالساق، ەلدە سەنىمحاتتاردى ونلاين الۋعا بولاتىنىن جانە سەنىمحاتتاردى ونلاين راسىمدەۋ نوتاريۋستاردىڭ جۇمىسىنا قالاي اسەر ەتەتىنى تۋرالى جازعان بولاتىنبىز.
اۆتور
مارلان جيەمباي
