باس پروكۋروردىڭ ورىنباسارى بيشىمبايەۆتىڭ ۇستالعان تۋىسى تۋرالى پىكىر ءبىلدىردى

باس پروكۋروردىڭ ورىنباسارى جاندوس ومىراليەۆ كۇدىكتى قۋاندىق بيشىمبايەۆتىڭ ۇستالعان تۋىسى تۋرالى پىكىر ءبىلدىردى، دەپ حابارلايدى Kazinform.

«ونىڭ تۋىسقاندىعىن مەن ناقتى ايتا المايمىن. ونىڭ اعاسى ما، ءىنىسى مە دەگەن اقپاراتتى قازىر بەرە المايمىن. ءبىراق تۋىسقانى ەكەنى ناقتى. سول كۇنى، وقيعا كەزىندە قاسىندا بولعان. ءبىراق وسى اۋىر قىلمىستىڭ جاسالعانى تۋرالى پوليتسيا ورگاندارىنا حابارلاماعان. ول تۋرالى قىلمىستىق كودەكستىڭ جەكە بابى بار. ءتىپتى قىلمىستى جاسىرۋعا تىرىسقان»، - دەدى ول.

ب ا ق وكىلدەرى مارقۇم سالتانات نۇكەنوۆانىڭ ءولىمىنىڭ رەسمي سەبەبىن ناقتىلاپ سۇرادى.

«بۇل قىلمىستىق ءىس بويىنشا قازىر بارلىق ءتيىستى ساراپتامالار تاعايىندالدى. بۇكىل اقپارات سىزدەرگە بەرىلدى عوي. ەندى مارقۇمنىڭ ولىمىنە الىپ كەلگەن بۇل، ارينە، ق. بيشىمبايەۆتىڭ ءىس ارەكەتى ەكەنى، زاڭسىز ءىس-ارەكەتتەرىنىڭ ناتيجەسى ەكەندىگى ءسوزسىز. قىلمىستىق ءىستى تەرگەۋ ناتيجەسى بويىنشا ساراپتامالار دايىندالعاننان كەيىن تەرگەۋ ورگاندارى قوسىمشا حابارلايدى»، - دەدى باس پروكۋروردىڭ ورىنباسارى.

سونداي- اق ول كۇدىكتىنىڭ اۋەلدە تەرگەۋ ورگاندارىنا جاۋاپ بەرۋدەن ءۇزىلدى-كەسىلدى باس تارتقانى تۋرالى مالىمەتكە پىكىر ءبىلدىردى.

«تەرگەۋ ورگاندارى ءبىرىنشى كۇنى وسى قىلمىسقا كىنالى ق. بيشىمبايەۆ ءوزىنىڭ قۇقىقتارىن پايدالانا وتىرىپ، قانداي دا ءبىر ماعلۇماتتار بەرۋدەن باس تارتىپ وتىرعانىن ايتقانىن بىلەسىزدەر. بۇل ءبىرىنشى كۇندەرى سولاي بولعان. ءبىراق قازىر قىلمىستىق ءىس ءجۇرىپ جاتىر. باسقا دا ناقتى دەرەكتەر ايتىلعان بولسا، ونىڭ سۇراتۋ كەرەك»، - دەدى جاندوس ومىراليەۆ.

اۆتور

ەسىمجان ناقتىباي