باس بوستاندىعىنان 15 جىلعا دەيىن ايىرۋ: پروكۋراتۋرا جەمقورلىققا قاراستىرىلعان جازانى ەسكە سالدى
استانا. KAZINFORM - استانا قالاسىنىڭ پروكۋراتۋراسى قازاقستان رەسپۋبليكاسىنىڭ زاڭناماسىنا سايكەس قانداي ارەكەتتەر سىبايلاس جەمقورلىققا بايلانىستى قىلمىستارعا جاتاتىنىن جانە ولار ءۇشىن قانداي جازا قاراستىرىلعانىن ءتۇسىندىردى.
استانا قالاسى پروكۋرورىنىڭ كومەكشىسى نۇرداۋلەت ابۋوۆ اتاپ وتكەندەي، قازاقستاننىڭ قىلمىستىق زاڭناماسى پارا الۋ نەمەسە پارا بەرۋ ءۇشىن عانا ەمەس، سونىمەن قاتار پاراقورلىقتا دەلدال بولۋ، قىزمەتتىك وكىلەتتىكتەردى تەرىس پايدالانۋ، بيلىكتى نەمەسە قىزمەتتىك وكىلەتتىكتەردى اسىرا پايدالانۋ، سەنىپ تاپسىرىلعان مۇلىكتى يەمدەنىپ الۋ جانە باسقا دا زاڭسىز ارەكەتتەر ءۇشىن جاۋاپكەرشىلىكتى كوزدەيدى.
- سونىمەن قاتار، زاڭ پارا الۋ جانە ۇسىنۋ ءۇشىن قاتاڭ جاۋاپكەرشىلىكتى بەلگىلەيدى. بۇل قىلمىس ءۇشىن ەڭ جوعارى جازا - 15 جىلعا باس بوستاندىعىنان ايىرۋ. مۇنىمەن قوسا، زاڭدا مۇلىك تاركىلەنىپ، بەلگىلى ءبىر لاۋازىمداردى اتقارۋعا نەمەسە بەلگىلى ءبىر كاسىبي قىزمەت تۇرلەرىمەن اينالىسۋعا ءومىر بويىنا تىيىم سالۋ كوزدەلگەن. وسىلايشا، سىبايلاس جەمقورلىققا بايلانىستى قىلمىس جاساۋ تەك باس بوستاندىعىنان ايىرۋعا عانا ەمەس، سونداي-اق اۋىر قارجىلىق جانە كاسىبي سالدارعا دا اكەلۋى مۇمكىن»، - دەدى نۇرداۋلەت ابۋوۆ استانا قالاسىنىڭ كوممۋنيكاتسيالار قىزمەتىندەگى بريفينگىدە.
ق ر قىلمىستىق كودەكسىنىڭ 366-بابىنا سايكەس، پارا الۋ - لاۋازىم يەسىنىڭ ءوز قىزمەتتىك وكىلەتتىگىن پايدالانۋعا بايلانىستى بەلگىلى ءبىر ارەكەتتەردى جاساعانى ءۇشىن اقشانى، مۇلىكتى، مۇلىكتىك قۇقىقتاردى زاڭسىز الۋى. پارا تىكەلەي نەمەسە دەلدال ارقىلى بەرىلۋى مۇمكىن.
زاڭسىز سىياقى قۇجاتتاردى قاراستىرۋدى جەدەلدەتۋ، بەلگىلى ءبىر شەشىمدەردىڭ قابىلدانۋىنا ىقپال ەتۋ، مەملەكەتتىك ساتىپ الۋ كەزىندە ارتىقشىلىقتارعا يە بولۋ نەمەسە جاۋاپكەرشىلىكتەن قۇتىلۋ ماقساتىندا ۇسىنىلۋى مۇمكىن.
ق ر قىلمىستىق كودەكسىنىڭ 367-بابى پارا بەرۋ ءۇشىن جەكە قىلمىستىق جاۋاپكەرشىلىكتى بەلگىلەيدى. جاۋاپكەرشىلىككە زاڭسىز سىياقىنى العان لاۋازىمدى يەسى عانا ەمەس، سونداي-اق بەلگىلى ءبىر ماسەلەنى شەشۋ ماقساتىندا ونى بەرگەن ادام دا تارتىلادى.
مىسالى، اكىمشىلىك حاتتاما تولتىرىلۋىنىڭ الدىن الۋ ءۇشىن پوليتسيا قىزمەتكەرىنە نەمەسە زاڭسىز ارتىقشىلىق الۋ ماقساتىندا مەملەكەتتىك قىزمەتشىگە اقشا بەرۋ دە قىلمىستىق قۇقىق بۇزۋ دەرەگى رەتىندە سانالادى.
ايتا كەتەيىك، بيىل 11-قاراشادا «سامۇرىق-قازىنا» ا ق باسقارما ءتوراعاسى ن. جاقىپوۆ، «ق ت ج» ۇ ك» ا ق باسقارما ءتوراعاسى ە. وتىنشيەۆ جانە سىبايلاس جەمقورلىق قىلمىسىن جاسادى دەگەن كۇدىككە ىلىنگەن وزگە دە ادامدار ۇستالدى.
