بالىق شارۋاشىلىعى كوميتەتىنىڭ ءتوراعاسى ۇستالدى - انتيكور
استانا. KAZINFORM - اۋىل شارۋاشىلىعى مينيسترلىگى بالىق شارۋاشىلىعى كوميتەتىنىڭ ءتوراعاسى جەمقورلىق جاساۋ كۇدىگىنە ىلىكتى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ كومەكشىسى، رەسمي وكىل دانيار بيگايداروۆ ءمالىم ەتتى.
«اگەنتتىك سىبايلاس جەمقورلىقتى، ونىڭ ىشىندە جوعارى لاۋازىمدى تۇلعالار اراسىندا انىقتاۋ جانە جولىن كەسۋ بويىنشا جۇمىستى جالعاستىرۋدا. وسىلايشا، اگەنتتىك اۋىل شارۋاشىلىعى مينيسترلىگى بالىق شارۋاشىلىعى كوميتەتىنىڭ ءتوراعاسى جانە باسقا تۇلعالارعا قاتىستى سوتقا دەيىنگى تەرگەۋ جۇرگىزۋدە. ولار 2021-2024 -جىلدار ارالىعىندا شاعىن جانە ورتا بيزنەس وكىلدەرىنەن جۇيەلى نەگىزدە پارا الدى دەگەن كۇدىككە ءىلىندى»، - دەدى دانيار بيگايداروۆ اگەنتتىكتە وتكەن باسپا ءسوز ءماسليحاتىندا.
رەسمي وكىلدىڭ مالىمدەۋىنشە، تەرگەۋ سوتى كۇدىكتىگە قاتىستى ەلەكتروندىق بىلەزىكتى پايدالانا وتىرىپ، ءۇي قاماعىنا الۋ تۇرىندەگى بۇلتارتپاۋ شاراسىنا سانكسيا بەردى.
«كۇدىكتى كىناسىن تولىق مويىندادى، قازىر باسقا تۇلعالاردىڭ ىسكە قاتىسىنىڭ بار-جوعى تەكسەرىلۋدە. تەرگەۋ جالعاسۋدا»، - دەدى ول.
اۆتور
داۋلەت ىزتىلەۋ
