بالالاردىڭ كورۋ قابىلەتى نەگە ناشارلاپ بارادى - وفتالمولوگ ءتۇسىندىردى

دارىگەردىڭ سوزىنشە، سوڭعى جىلدارى بالالاردىڭ كوزىنە تۇسەتىن سالماق ايتارلىقتاي ارتقان.

— بۇرىن كورۋ قابىلەتى كوبىنە كىتاپتى كوپ وقيتىن بالالاردا تومەندەيتىن. قازىر كوزگە تۇسەتىن سالماق شامامەن 80 پايىزعا ارتتى. نەگىزگى سەبەپ تەلەۆيزور ەمەس، تەلەفون مەن پلانشەت سياقتى جاقىن قاشىقتىقتان قولدانىلاتىن گادجەتتەر. اسىرەسە بۇل 18-19 جاسقا دەيىنگى بالالاردىڭ كورۋ قابىلەتىنە قاتتى اسەر ەتەدى، — دەدى ەربول سارىمساقوۆ.

ونىڭ ايتۋىنشا، گادجەتتى تولىق الىپ قويۋدان گورى، ونى دۇرىس پايدالانۋ رەجيمىن قالىپتاستىرۋ ماڭىزدى.

— 2 جاسقا دەيىنگى بالالارعا تەلەفوندى مۇلدە بەرمەۋ كەرەك. 2-7 جاس ارالىعىندا ەكران ۋاقىتى كۇنىنە ءبىر ساعاتتان اسپاعانى ءجون. 7-14 جاستا گادجەتتى ۇزىلىسپەن قولدانۋ قاجەت. ال 14 جاستان كەيىن جارتى ساعات قاراپ، جارتى ساعات دەمالاتىن رەجيمدى ۇستانسا، كوزگە تۇسەتىن سالماق ايتارلىقتاي ازايادى، — دەدى ول.

مامان اتا-انالار بالاسىنىڭ كورۋ قابىلەتى تومەندەگەنىن ەرتە كەزەڭدە بايقاسا، دەر كەزىندە دارىگەرگە قارالۋى كەرەگىن ايتتى.

— بالا تەلەديدارعا تىم جاقىن وتىرسا، الىستاعى زاتقا قاراعاندا كوزىن سىعىرايتسا، كوزىن ءجيى ۋقالاپ نەمەسە جىپىلىقتاتاتىن بولسا، بۇل كورۋ قابىلەتىنىڭ ناشارلاعانىنىڭ بەلگىسى بولۋى مۇمكىن. كەيبىر بالالار اتا-اناسى ۇرسادى دەپ قورقىپ، كوزى دۇرىس كورمەيتىنىن ايتپاي جۇرەدى. بۇل وقۋ ۇلگەرىمىنە دە اسەر ەتەدى، — دەدى وفتالمولوگ.

ەربول سارىمساقوۆتىڭ ايتۋىنشا، كوز ساۋلىعىن ساقتاۋدا كۇندەلىكتى سەرۋەندەۋدىڭ دە ماڭىزى زور.

— كۇنىنە ەكى ساعاتتان ارتىق تازا اۋادا سەرۋەندەيتىن بالالاردا كورۋ قابىلەتىنىڭ تومەندەۋى 50-60 پايىزعا سيرەك كەزدەسەدى. سەبەبى بۇل كەزدە بالا گادجەتتەن الىستاپ، كوزى الىسقا قاراپ، كوز بۇلشىقەتتەرى دەمالادى، — دەدى ول.

ايتا كەتەيىك، بۇعان دەيىن، مەكتەپتەرىندە وقيتىن وقۋشىلار اراسىندا ميوپيا كورسەتكىشى %30- عا جەتكەنىن جازعان ەدىك.