بالالارعا «كەلەشەك» كاپيتالى قالاي تولەنەدى - زاڭ جوباسى

استانا. KAZINFORM - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپارات، قوعامدىق دامۋ، مادەنيەت جانە ارحيۆ ءىسى سالالارىنداعى نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

مەملەكەت باسشىسىنىڭ تاپسىرماسىن ورىنداۋ ماقساتىندا زاڭ جوباسىنا «كەلەشەك» ءبىرىڭعاي ەرىكتى جيناقتاۋ جۇيەسىنىڭ قىزمەتىن رەگلامەنتتەيتىن عىلىم جانە جوعارى ءبىلىم مينيسترلىگىنىڭ تۇزەتۋلەرى ەنگىزىلدى.

زاڭ جوباسىن تالقىلاۋ بارىسىندا ءماجىلىس دەپۋتاتى ۆەرا كيم «كەلەشەك» كاپيتالىنا قاتىستى بىرنەشە ماسەلەنى كوتەردى.

«زاڭ جوباسىندا بيۋدجەت قاراجاتى ەسەبىنەن باستاپقى ءبىلىم بەرۋ كاپيتالىن ەسەپتەۋ بالا 5 جاسقا تولعان كەزدە جۇزەگە اسىرىلادى دەپ كوزدەلگەن. بۇرىن ايتىلعانداي، باستاپقى ءبىلىم بەرۋ كاپيتالىنىڭ مولشەرى 60 ا ە ك بولادى. ال 6، 7 جانە ودان دا جوعارى جاستاعى بالالارعا باستاپقى كاپيتال ەسەپتەلە مە؟ سول سياقتى ازاماتتاردىڭ قولدانىستاعى مەملەكەتتىك ءبىلىم بەرۋ جيناقتاۋ جۇيەسى شەڭبەرىندەگى شوتى بولسا، ولار سول جيناقپەن، سىياقىسىن جوعالتپاي «كەلەشەك» جوباسىنا اۋىسىپ، باستاپقى ءبىلىم بەرۋ كاپيتالىنا قاتىسا الا ما؟»، - دەگەن ساۋال جولدادى.

حالىق قالاۋلىسىنىڭ ساۋالىنا عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ جاۋاپ بەردى.

«كەلەشەك» كاپيتالىنىڭ مەملەكەتتىك جيناقتاۋ جۇيەسىنەن ءۇش ايىرماشىلىعى بار. ءبىرىنشى، 5 جاسقا تولعان سالىمشىعا مەملەكەتتەن 60 ا ە ك كولەمىندە، ال جەتىم بالالار مەن اتا-اناسىنىڭ قامقورلىعىنسىز قالعان بالالار ءۇشىن 120 ا ە ك العاشقى جارنا اۋدارىلادى. ەكىنشىدەن، «كەلەشەك» جۇيەسىندە سىياقى ەسەپتەۋ كەزىندە بانكتەر ءۇشىن ەڭ تومەنگى مولشەر بەلگىلەنەدى. ول ۇلتتىق بانك بەلگىلەگەن بازالىق مولشەرلەمەدەن كەم بولماۋى ءتيىس. مىسالى، ۇلتتىق بانكتىڭ بازالىق مولشەرلەمەسى %15 بولسا، بانكتەردىڭ مولشەرلەمەسى %12-13- دان تومەن بولماۋى كەرەك. ءۇشىنشى ايىرماشىلىق، جوباعا كەپىلدىكتى قامتاماسىز ەتەتىن ساقتاندىرۋ كومپانيالارى قاتىسادى. بالانىڭ اتا-اناسى ەڭبەككە قابىلەتتىلىگىنەن ايرىلعان جاعدايدا نەمەسە اسىراۋشىسىنان ايرىلعان جاعدايدا ساقتاندىرۋ كومپانيالارى بالا 18 جاسقا تولعانعا دەيىن اتا-اناسىنىڭ اتىنان كاپيتال اۋدارۋدى جۇرگىزۋدى جالعاستىرادى»، - دەيدى ءمينيستردىڭ ورىنباسارى.

اۆتور

داۋلەت ىزتىلەۋ