بالالار ءۇيىنىڭ تاربيەلەنۋشىسى رەسپۋبليكالىق سۇلۋلىق فەستيۆالىندە باس جۇلدەنى جەڭىپ الدى
الماتى قالاسىندا وتكەن ءداستۇرلى New Year's Stars 2023 رەسپۋبليكالىق بال- فەستيۆالىندە سولتۇستىك قازاقستان وبلىسى پولۋدين ەلدى مەكەنىندەگى ومىرلىك قيىن جاعدايعا تۇسكەن بالالاردى قولداۋ ورتالىعىنىڭ تاربيەلەنۋشىسى بايقاۋدىڭ باستى ءتاجىن جانە «Super grand prix» اتاعىن يەلەندى، دەپ حابارلايدى Kazinform.
س ق و ءبىلىم باسقارماسى باسپا ءسوز قىزمەتىنىڭ مالىمەتىنشە، قازىلار القاسىنىڭ شەشىمىمەن م. جۇمابايەۆ اۋدانىنداعى ومىرلىك قيىن جاعدايعا تۇسكەن بالالاردى قولداۋ ورتالىعىنىڭ تاربيەلەنۋشىسى توميريس لوپاريەۆا ۇزدىك اتاندى. ول بايقاۋدىڭ ارنايى تاجىنەن بولەك، قازىلار القاسى مۇشەلەرىنىڭ ديپلومىمەن جانە ەڭ ۇزدىك دارىن يەگەرى ديپلومىمەن ماراپاتتالدى.
بايقاۋ ءۇش نەگىزگى كەزەڭنەن تۇردى: كارناۆال كوستيۋمدەرىن كيىپ شىعۋ، شىعارماشىلىق ونەر كورسەتۋ مەن بال كويلەكتەرىمەن دەفيلە.
بايقاۋدىڭ ءبىرىنشى كەزەڭىندە توميريس دانالىق پەن ادىلەتتىلىكتىڭ نىشانى - سامۇرىق قۇستىڭ بەينەسىندە سومدادى.
شىعارماشىلىق بايقاۋدا قازىلار القاسىنىڭ الدىنا جاپون كوبەلەگى كوستيۋمىن كيىپ «پولەت تانتسۋيۋشەي بابوچكي» دەپ اتالاتىن بي بيلەدى.
بايقاۋدىڭ ءۇشىنشى كەزەڭىندە بايقاۋعا قاتىسۋشىلار وزدەرىنىڭ كەشكى جانە بال كويلەكتەرىن كورسەتتى.
ۇستازدارىنىڭ ايتۋىنشا، توميريس لوپاريەۆا 5-سىنىپتا وقيدى. وتە بەلسەندى جانە اقكوڭىل قىز. بىلمەككە قۇشتار. ەرمەكسازدى پايدالانىپ سۋرەت جاساۋ ونەرىمەن اينالىسادى. سپورتپەن، بيمەن شۇعىلدانادى.
«بايقاۋ وتە ۇنادى. مەن قازاقستاننىڭ ەڭ ادەمى جانە دارىندى قىزدارىمەن كەزدەسكەنىمە وتە قۋانىشتىمىن. بي بيلەۋگە شىققان كەزدە قاتتى قوبالجىدىم، ءبىراق بىلدىرتپەۋگە تىرىستىم. جوعارى جەتىستىككە جەتكەنىمە قۋانىشتىمىن! تاربيەشىلەرىمە، دوستارىما، مەنى قولداعان جانكۇيەرلەرگە جانە دەمەۋشىلەرگە العىسىم شەكسىز»، - دەيدى بايقاۋدان العان اسەرىمەن بولىسكەن توميريس.
اۆتور
اقەركە داۋرەنبەك قىزى
