باكۋ مەن ەريەۆان شەكارانى دەليميتاتسيالاۋ بويىنشا كەلىسسوزدەردىڭ كەلەسى كەزەڭىن وتكىزۋدى جوسپارلادى

استانا. KAZINFORM - بۇل تۋرالى سەيسەنبى كۇنى ازەربايجان پرەزيدەنتى يلحام الييەۆ ازەربايجان تەلەارنالارىنا بەرگەن سۇحباتىندا ايتتى.

- وسى ايدا (قاڭتار) قالاي بولعاندا دا، ءبىزدىڭ باستامامىز بويىنشا بۇل ماسەلەنى شەشۋدى جالعاستىرۋ ءۇشىن ازەربايجان مەن ارمەنيانىڭ دەليميتاتسيالاۋ كوميسسياسىنىڭ كەلەسى وتىرىسى ءوتۋى كەرەك، - دەدى يلحام اليەۆ ازەربايجان تەلەارنالارىنا بەرگەن سۇحباتىندا.

ازەربايجان پرەزيدەنتى بۇل تۋرالى ءتيىستى اقپارات ارميان تاراپىنا بەرىلگەنىن جانە جاۋاپ رەتىندە ولار تاراپىنان ەرەكشە قارسىلىق بولماعانىن ءتۇسىندىردى.

يلحام اليەۆتىڭ ايتۋىنشا، بۇرىن دەليميتاتسيا جانە دەماركاتسيا جونىندەگى ارمەنيا مەن ازەربايجان كوميسسيالارى اراسىندا كەلىسىلگەن حاتتاما شەكارانى ناقتىلاۋ كەزىندە كوپتەگەن فاكتوردى ەسەپكە الۋدى كوزدەيدى. ولاردىڭ ىشىندە قاۋىپسىزدىك، كوممۋنيكاتسيا، ەلدى مەكەندەر، تاريحي فاكتورلار، ەكولوگيالىق فاكتورلار جانە ت. ب. بار.

ازەربايجان تاراپىمەن كەزدەسۋ وتكىزۋ جوسپارى وسى سالاداعى ارميان كوميسسياسىن باسقاراتىن ارمەنيا پرەمەر-ءمينيسترىنىڭ ورىنباسارى ميگەر گريگورياننىڭ كەڭسەسىندە دە راستالدى.

- كەزدەسۋ جاقىن ارادا وتەدى، ناقتى كۇنى ءالى كەلىسىلگەن جوق، - دەپ اتاپ ءوتتى ۆەدومستۆو.

قازان ايىندا ارمەنيانىڭ ۇلتتىق اسسامبلەياسى ارمەنيا مەن ازەربايجان اراسىنداعى مەملەكەتتىك شەكارانى دەليميتاتسيالاۋ جونىندەگى كوميسسيالاردىڭ بىرلەسكەن قىزمەتى تۋرالى ەرەجەنى راتيفيكاتسيالادى.

قاراشا ايىنىڭ باسىندا ازەربايجان مەن ارمەنيا شەكاراسىندا ەكى ەلدىڭ ۆيتسە-پرەمەرلەرىنىڭ توراعالىعىمەن ەلدەر اراسىنداعى شەكارانى دەليميتاتسيالاۋ جونىندەگى مەملەكەتتىك كوميسسيانىڭ 10- وتىرىسى ءوتتى. تاراپتار دەليميتاتسيالاۋ جۇمىستارىن جۇرگىزۋ ءتارتىبى بويىنشا ءتيىستى نۇسقاۋلىقتاردىڭ جوباسى بويىنشا پىكىر الماستى.

تامىز ايىندا ارمەنيا ازەربايجانعا بىتىمگەرشىلىك كەلىسىمدى تولىق كەلىسۋ بويىنشا ۇسىنىستار پاكەتىن جولداعان بولاتىن. قاراشا ايىنىڭ باسىندا باكۋ ەريەۆانعا بەيبىت كەلىسىمگە قاتىستى ءوز ۇسىنىستارىن جىبەردى.

ەركەجان سماعۇلوۆا
اۆتور