باۆاريا قازاقستانمەن ساۋدا-ساتتىقتى جانداندىرۋدا ايرىقشا ءرول اتقارادى - پرەزيدەنت

كەزدەسۋ بارىسىندا پرەزيدەنت گەرمانيانىڭ جوعارى باسشىلىعىمەن ءبىر كۇن بۇرىن بەرليندە جۇرگىزىلگەن كەلىسسوزدەر تابىستى ءارى ناتيجەلى سيپاتتا وربىگەنىن اتاپ ءوتتى.

قازاقستان پرەزيدەنتى باۆاريانىڭ سان قىرلى قازاق- گەرمان قارىم-قاتىناسىن نىعايتۋعا قوسقان ۇلەسىن جوعارى باعالايتىنىن ايتتى.

- باۆاريا قازاقستانمەن ساۋدا-ساتتىقتى جانداندىرۋ جانە بايلانىستاردى دامىتۋدا ايرىقشا ءرول اتقارادى. گەرمانيا - ەلىمىزدىڭ ماڭىزدى سەرىكتەسى، ەۋروپاداعى جانە ودان تىسقارى جەرلەردەگى ستراتەگيالىق ارىپتەسى سانالادى. ويتكەنى ەلىڭىزدىڭ ىقپالى مەن ءرولى، جەتىستىكتەرى ەۋروپا اۋماعىنان دا الىسقا تارالعان. ءبىز بۇعان سەنىمدىمىز. گەرمانيا - ەكونوميكاسى جاعىنان الەمدەگى ءۇشىنشى ەل، - دەدى قاسىم-جومارت توقايەۆ.

اڭگىمەلەسۋ بارىسىندا پارلامەنتارالىق ىقپالداستىق ماسەلەلەرى قوزعالىپ، مادەني- گۋمانيتارلىق بايلانىستاردى نىعايتۋ پەرسپەكتيۆاسى تالقىلاندى.

يلزە ايگنەر ساپار باعدارلاماسىنىڭ تىعىزدىعىنا قاراماستان باۆاريا لاندتاگىنا كەلۋگە ۋاقىت تاپقانى ءۇشىن مەملەكەت باسشىسىنا العىس ايتتى.

لاندتاگ ءتوراعاسىنىڭ ايتۋىنشا، باۆاريا قازاقستانمەن ساۋدا- ەكونوميكالىق، كولىك جانە ينۆەستيتسيالىق بايلانىستاردى نىعايتۋ مۇمكىندىكتەرىن مۇقيات زەردەلەيدى.

پرەزيدەنت پەن لاندتاگ ءتوراعاسى كەزدەسۋ سوڭىندا قازاقستان مەن باۆاريا اراسىنداعى مازمۇندى ديالوگتى كەڭەيتۋگە مۇددەلى ەكەنىن راستادى.