ب ق و- دا دارىگەرلەر كەسىرىنەن قاتەرلى ىسىككە شالدىققان 58 ناۋقاستىڭ قۇقىعى بۇزىلعان
استانا. KAZINFORM - بۇگىندە ونكولوگيالىق ديسپانسەردىڭ كىنالى قىزمەتكەرلەرى جاۋاپكەرشىلىككە تارتىلدى. بۇل تۋرالى ب ق و پروكۋراتۋراسىنىڭ باسپا ءسوز قىزمەتى ءمالىم ەتتى.
باتىس قازاقستان وبلىسىنىڭ پروكۋراتۋراسى مەديتسينالىق ۇيىمداردىڭ ونكولوگيالىق اۋرۋعا شالدىققان ازاماتتاردىڭ قۇقىقتارىن ساقتاۋ ماسەلەلەرىنە تالداۋ جاسادى. بۇل سالادا جۇيەلى بۇزۋشىلىقتار انىقتالدى.
- دارىگەرلەر مەديتسينالىق-الەۋمەتتىك ساراپتاما جۇرگىزۋ ەرەجەلەرىنىڭ تالاپتارىن ساقتاماعان. اتاپ ايتقاندا، قاتەرلى ىسىكپەن اۋىراتىن جانە دەنە فۋنكسيالارىنىڭ تۇراقتى بۇزىلۋى بار 58 ازاماتتىڭ مۇگەدەكتىگى بولماعانى انىقتالدى. بەلگىلەنگەن تالاپتارعا قايشى مەديتسينا قىزمەتكەرلەرى ولاردى مەديتسينالىق- الەۋمەتتىك ساراپتاماعا جىبەرمەي، ازاماتتاردىڭ كونستيتۋتسيالىق قۇقىقتارىنىڭ بۇزىلۋىنا اكەپ سوقتى، - دەلىنگەن حابارلامادا.
قازىرگى ۋاقىتتا ونكولوگيالىق ناۋقاستاردى ساراپتاماعا جىبەرۋ ءۇشىن پروكۋرورلىق قاداعالاۋ اكتىسى بويىنشا ماتەريالدار دايىندالۋدا.
ۆەدومستۆو مالىمەتىنشە، بۇزۋشىلىقتار ءۇشىن ونكولوگيالىق ديسپانسەردىڭ كىنالى قىزمەتكەرلەرى تارتىپتىك جاۋاپكەرشىلىككە تارتىلدى.
ايتا كەتەيىك، ازاماتتاردىڭ قۇقىقتارىن ساقتاۋ ماسەلەلەرى پروكۋراتۋرانىڭ تۇراقتى باقىلاۋىندا.
بۇعان دەيىن پروكۋراتۋرا پاۆلودار پسيحونيەۆرولوگيا ورتالىعىندا بالالاردى كوپتەن بەرى ۇرىپ-سوعىپ كەلگەنىن انىقتادى.
اۆتور
اينۇر تۋماكبايەۆا
