ب ق و- دا گاز بەن ەلەكتر جارىعىنا رەسەيگە تاۋەلدىلىك قاشان شەشىلەدى - اكىم جاۋابى

استانا. KAZINFORM - باتىس قازاقستان وبلىسىنىڭ كەيبىر اۋداندارى مەن ەلدى مەكەندەرى كورشى رەسەي گازى مەن ەلەكتر ەنەرگياسىمەن قامتىلعان. وبلىس باسشىسى ناريمان تورەعاليەۆ سىرتقى تاۋەلدىلىكتى ازايتىپ، ماسەلەنى شەشۋ جولدارىن اتادى.

«ەنەرگەتيكا سالاسىنا قاتىستى ماڭىزدى ماسەلە تاۋەلدىلىكتى ازايتۋ. بۇگىندە وبلىستىڭ جانىبەك جانە بوكەي ورداسى اۋدانىن ەلەكتر جارىعىمەن تولىقتاي رەسەي فەدەراتسياسى قامتىپ وتىر. وسىعان بايلانىستى قازىر 5 مەگاۆاتتى گاز پورشەندى قوندىرعىسىن ورناتۋ بويىنشا كەلىسسوز جۇرگىزىپ جاتىرمىز»، - دەدى ناريمان تورەعاليەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، اتالعان جۇمىس ەنەرگەتيكا مينيسترلىگىمەن بىرلەسە اتقارىلادى.

«گاز سالاسى بويىنشا، وبلىستا 4 ەلدى مەكەن رەسەيدەن كەلەتىن گازبەن قامتىلعان. اتاپ ايتقاندا، جانىبەك اۋدانىندا 3 اۋىل (قامىستى، بورسى، تالوۆ) جانە بايتەرەك اۋدانىندا 1 اۋىل (رازدولنوە). بۇگىندە جانىبەك اۋدانى بويىنشا قۇرىلىس جۇمىستارىنا جاۋاپتى مەردىگەر كومپانيا انىقتالىپ، كەلەسى جىلى جۇزەگە اسىرىلادى. ال بايتەرەك اۋدانى بويىنشا جوبا جاساقتالىپ جاتىر»، - دەپ ءتۇسىندىردى ءوڭىر باسشىسى.

اۆتور

داۋلەت ىزتىلەۋ