ب ۇ ۇ باسشىسى حالىقارالىق قاۋىمداستىقتاردى مۇحيتتاردى قۇتقارۋعا شاقىردى
استانا. KAZINFORM - ب ۇ ۇ باس حاتشىسى انتونيۋ گۋتەرريش سەنبى كۇنى حالىقارالىق قاۋىمداستىقتى مۇحيتتاردى قۇتقارۋ ءۇشىن شۇعىل شارالار قابىلداۋعا شاقىردى. بۇل تۋرالى شينحۋا اگەنتتىگى جازدى.

«مۇحيت جەر بەتىندەگى بارلىق تىرشىلىكتى قولدايدى ءارى نىعايتادى، الايدا ءبىزدىڭ مۇحيتىمىزدىڭ باسىنا ءىس ءتۇستى، قيىندىققا تاپ بولدى. بۇعان تەك ءوزىمىز كىنالىمىز»، - دەلىنگەن ب ۇ ۇ باس حاتشىسىنىڭ جىل سايىن اتالىپ وتەتىن دۇنيەجۇزىلىك مۇحيتتار كۇنىنە ارنالعان جولداۋىندا.
گۋتەرريش تەڭىز دەڭگەيىنىڭ كوتەرىلۋىنە اكەلەتىن كليمات وزگەرىسىنىڭ اسەرىن ەرەكشە اتاپ ءوتتى. ونىڭ سوزىنشە، كليماتتاعى بۇل وزگەرىستەر «دامۋشى ارالدارداعى شاعىن مەملەكەتتەر مەن جاعالاۋداعى پوپۋلياتسيالاردىڭ ءومىر سۇرۋىنە» قاۋىپ ءتوندىرىپ قانا قويماي، «ەكسترەمالدى اۋا رايى بارلىعىمىزعا اسەرىن تيگىزەدى».
دۇنيەجۇزىلىك ورگاننىڭ باسشىسى وتكەن ماۋسىمدا قابىلدانعان ۇلتتىق يۋريسديكسيادان تىس جەرلەردە تەڭىز بيولوگيالىق ارتۇرلىلىگىن ساقتاۋ جانە ورنىقتى پايدالانۋ تۋرالى ب ۇ ۇ- نىڭ تەڭىز قۇقىعى تۋرالى كونۆەنتسياسىنا سايكەس كەلىسىمدى «مۇحيتتاردى باسقارۋدىڭ سوڭعى ونجىلدىقتاعى ەڭ ماڭىزدى جاڭا كەلىسىمى» دەپ اتادى.
بيىلعى بولاشاق سامميتىندە جانە كەلەسى جىلى فرانسيادا وتەتىن ب ۇ ۇ- نىڭ مۇحيت كونفەرەنسياسىندا ماڭىزدى مۇمكىندىكتەردى اتاپ وتكەن گۋتەرريش ۇكىمەتتەردى، بيزنەس وكىلدەرىن، ينۆەستورلاردى، عالىمداردى جانە قاۋىمداستىقتاردى «ءبىزدىڭ باعالى تەڭىز جانە جاعالاۋ ەكوجۇيەلەرىمىزدى قالپىنا كەلتىرىپ، قورعاي الاتىن شارالار قابىلداۋعا مىندەتتەمە الۋعا» شاقىردى.
اۆتور
باقىتگۇل اباي قىزى