ازەربايجاندا 26-جەلتوقسان ازا تۇتۋ كۇنى بولىپ جاريالاندى
استانا. KAZINFORM - اقتاۋدا Embraer 190 جولاۋشىلار ۇشاعىنىڭ اپاتقا ۇشىراۋىنا بايلانىستى 26-جەلتوقسان ازەربايجاندا ازا تۇتۋ كۇنى بولىپ جاريالاندى، - دەپ حابارلايدى Azertac News Agency.
پورتالدىڭ حابارلاۋىنشا، ءتيىستى بۇيرىققا ازەربايجان پرەزيدەنتى يلحام اليەۆ قول قويعان.
اقتاۋداعى ۇشاق اپاتى تۋرالى نە بەلگىلى؟
ەسكە سالايىق، 25-جەلتوقساندا اقتاۋ ماڭىندا باكۋدەن گروزنىيعا ۇشىپ بارا جاتقان ۇشاق اپاتقا ۇشىرادى. بۇل - Azerbaijan Airlines اۋەكومپانياسىنا تيەسىلى ەمبراەر 190 ۇشاعى. الدىن الا اقپارات بويىنشا ۇشاق بورتىندا 67 ادام، ونىڭ ىشىندە 5 ەكيپاج مۇشەسى بولعان.
كەيىنىرەك قازاقستاننىڭ توتەنشە جاعدايلار مينيسترلىگى وكىلدەرى وقيعا ورنىنا باردى. قۇتقارۋشىلار جەتكەن كەزدە ۇشاق جانىپ جاتقان.
قازاقستاننىڭ كولىك مينيسترلىگى دە توتەنشە جاعدايعا بايلانىستى مالىمدەمە جاسادى. ال الەۋمەتتىك جەلىدە وقيعا ورنىنان ۆيدەولار تارادى.
كەيىنىرەك ت ج م وقيعا ورنىنداعى ءورت سوندىرىلگەنىن حابارلادى. ماڭعىستاۋ وبلىسىنىڭ اكىمى نۇرداۋلەت قيلىباي ۇشاق اپاتى بولعان جەرگە باردى.
كولىك مينيسترلىگى ۇشاق بورتىندا بولعان ادامدار جونىندە الدىن الا مىناداي اقپارات جاريالادى: بورتتا 37 ازەربايجان، 6 قازاقستان، 3 قىرعىزستان، 16 ر ف ازاماتى بولعان.
پرەزيدەنت قاسىم-جومارت توقايەۆتىڭ تاپسىرماسىمەن ۇشاق اپاتىنا قاتىستى كوميسسيا قۇرىلدى. كوميسسيا قۇرامىنا پرەمەر- ءمينيستردىڭ ورىنباسارى، ماڭعىستاۋ وبلىسىنىڭ اكىمى، توتەنشە جاعدايلار، كولىك، سىرتقى ىستەر، ىشكى ىستەر، ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ مينيسترلىكتەرىنىڭ باسشىلىعى، باس كولىك پروكۋرورى كىردى.
كولىكتەگى پوليتسيا دەپارتامەنتى توتەنشە جاعدايعا بايلانىستى قىلمىستىق ءىس قوزعادى.
ماڭعىستاۋ وبلىستىق دەنساۋلىق ساقتاۋ باسقارماسىنىڭ الدىن الا مالىمەتى بويىنشا 4 ادام قازا تاپقانى راستالعان.
اقتاۋ ماڭىنداعى ۇشاق اپاتىنان امان قالعانداردىڭ ۆيدەوسى تارادى.
ال Azerbaijan Airlines جولاۋشىلاردىڭ ءتىزىمىن جاريالادى.
قازاقستاننىڭ توتەنشە جاعدايلار مينيسترلىگىنىڭ ساعات 15.55-تەگى مالىمەتى بويىنشا امان قالعان 29 ادام بار، ونىڭ ىشىندە 2 ەۋى - بالا، ولار اۋرۋحاناعا جەتكىزىلدى.
اقتاۋداعى ۇشاق اپاتىنا قاتىستى باس پروكۋراتۋرا مالىمدەمە جاساپ، وقيعا ورنىنا ەلدىڭ باس كولىك پروكۋرورى بارعانىن حابارلادى. قىلمىستىق ءىس قازاقستان رەسپۋبليكاسى باس پروكۋرورىنىڭ ەرەكشە باقىلاۋىندا.
مەملەكەت باسشىسى قاسىم-جومارت توقايەۆ ازەربايجان پرەزيدەنتى يلحام اليەۆكە كوڭىل ايتىپ، مەملەكەتتىك كوميسسيا ءتيىستى شارالار قابىلداپ، ازەربايجان تاراپىنا كومەك كورسەتەتىنىن مالىمدەدى.
