ازەربايجان سىرتقى ىستەر مينيسترلىگى كانادا پرەمەر- ءمينيسترىنىڭ مالىمدەمەسىن ايىپتادى

استانا. KAZINFORM - ازەربايجان سىرتقى ىستەر مينيسترلىگى كانادا سىرتقى ىستەر ءمينيسترى مەلاني دجوليدىڭ 22 -قىركۇيەكتە جاساعان قاراباق تۋرالى مالىمدەمەسىن ايىپتاپ، تولىعىمەن جوققا شىعاردى. بۇل تۋرالى مينيسترلىكتىڭ باسپا ءسوز حاتشىسى ايحان گادجيزادە جاريالاعان جاۋاپتا ايتىلعان.

مالىمدەمەدە رەسمي وكىل كانادالىق ءمينيستردى ارميان-ازەربايجان قاقتىعىسىنا قاتىستى فاكتىلەردى بۇرمالاعانى ءۇشىن سىنعا الدى.

«ارمەنيا مەن ازەربايجان اراسىنداعى شيەلەنىس ءتورت جىل بۇرىن حالىقارالىق قۇقىق نورمالارى مەن قاعيداتتارى نەگىزىندە اياقتالدى. ازەربايجان 2023 -جىلى قاراباق ايماعىنداعى ەگەمەندىگىن تولىعىمەن قالپىنا كەلتىرىپ، ارمەنيا قارۋلى كۇشتەرىنىڭ زاڭسىز قاتىسۋىن توقتاتتى»، - دەپ جازدى گادجيزادە.

ب ا ق حابارلاۋىنشا، كانادا سىرتقى ىستەر ءمينيسترى مەلاني دجولي 22 -قىركۇيەكتە جاساعان مالىمدەمەسىندە قاراباقتاعى جاعدايعا توقتالعان. ول ازەربايجاننىڭ ايماقتاعى اسكەري وپەراتسياسىنىڭ ءبىر جىلدىعىن اتاپ ءوتىپ، 100 مىڭنان استام بەيبىت تۇرعىننىڭ، ونىڭ ىشىندە 30 مىڭ بالانىڭ جەر اۋدارىلعانىن جانە گۋمانيتارلىق قاجەتتىلىكتەردىڭ ارتقانىن دالەل ەتتى. دجولي ازەربايجاننىڭ اسكەري ارەكەتتەرى مەن لاچين دالىزىنە گۋمانيتارلىق جۇكتەردىڭ قورشاۋىن سىنعا الىپ، ارمەنيا مەن ازەربايجان اراسىندا كونسترۋكتيۆتى كەلىسسوزدەر جۇرگىزۋگە جانە جان-جاقتى بىتىمگەرشىلىك كەلىسىمگە كەلۋگە شاقىردى.

«كانادانىڭ ءبىزدىڭ ايماقتا بەيبىتشىلىك پەن قاۋىپسىزدىكتى قالاي ورناتۋ كەرەكتىگى تۋرالى ايتۋعا مورالدىق قۇقىعى جوق. مۇنداي ارانداتۋشىلىق جانە نەگىزسىز مالىمدەمەلەر حالىقارالىق قۇقىق قاعيداتتارىن قۇرمەتتەۋگە نەگىزدەلگەن ايماقتىڭ بولاشاق دامۋى مەن ىلگەرىلەۋىنە كەدەرگى جاساۋدان باسقا ەشتەڭە ەمەس»، - دەپ قوستى مينيسترلىك وكىلى.

بۇعان دەيىن باكۋ امەريكالىق كونگرەسسمەندەردى ازەربايجان تۋرالى فاكتىلەردى بۇرمالادى دەپ ايىپتاعان بولاتىن. سىرتقى ىستەر مينيسترلىگى ا ق ش كونگرەسىندەگى كەيبىر توپتاردىڭ ازەربايجانداعى جاعدايدى اشىق تۇردە بۇرمالاپ، ادام قۇقىقتارىن بۇركەنىپ، ەلدىڭ ەگەمەندىگى مەن اۋماقتىق تۇتاستىعىنا قۇرمەتسىزدىك تانىتقانىن اتاپ ءوتتى.

بۇعان قوسا، ازەربايجان س ءى م نيدەرلاندتىڭ 13- قىركۇيەكتە جاريالانعان سىرتقى ساياسي باعدارلاماسىن سىنعا الدى، وندا ازەربايجان مەن ارمەنيا اراسىنداعى 44 كۇندىك سوعىس «تاۋلى قاراباقتى باسىپ الۋ» رەتىندە دەپ سيپاتتالعان.

ازەربايجان س ءى م سونداي-اق فرانسيا سىرتقى ساياسي ۆەدومستۆوسىنىڭ وسى ەلدىڭ ازاماتتارىن وڭتۇستىك كاۆكاز رەسپۋبليكاسىنا بارۋدان باس تارتۋعا شاقىرعان مالىمدەمەسىن ايىپتادى.

اۆتور

زارينا تۋعانبايەۆا