ازەربايجان ەۋروپا كەڭەسى پارلامەنتتىك اسسامبلەياسىنداعى جۇمىسىن توقتاتتى

باكۋ. KAZINFORM - ازەربايجان دەلەگاتسياسى ەۋروپا كەڭەسىنىڭ پارلامەنتتىك اسسامبلەياسىندا (ە ك پ ا) ءوزارا ءىس- قيمىلدىڭ جانە وعان قاتىسۋدىڭ توقتاتىلاتىنىن جاريالادى.

دەلەگاتسيا 24-قاڭتاردا ستراسبۋرگتەگى قۇرىلىم وتىرىسىندا كەلەسىدەي مالىمدەمە جاسادى:

- ازەربايجان رەسپۋبليكاسى - تاۋەلسىز، ەگەمەن، دەموكراتيالىق جانە كوپ مادەنيەتتى ەل. دەموكراتيا - ءبىزدىڭ سانالى تاڭداۋىمىز. 1991-جىلى تاۋەلسىزدىك العاننان بەرى ءبىز ادام قۇقىقتارى مەن زاڭنىڭ ۇستەمدىگىن قامتاماسىز ەتۋدە ۇلكەن جەتىستىكتەرگە جەتتىك.

ەۋروپا كەڭەسى پارلامەنتتىك اسسامبلەياسىنىڭ (ە ك پ ا) نەگىزگى ماقساتى - ءوزارا سىيلاستىق پەن تەڭ شارتتارعا نەگىزدەلگەن ءارتۇرلى ەلدەردىڭ پارلامەنتاريلەرى اراسىنداعى ديالوگ ءۇشىن پلاتفورمانى قامتاماسىز ەتۋ.

2001 -جىلى ەۋروپا كەڭەسىنە كىرگەن ازەربايجان ادام قۇقىقتارى مەن زاڭنىڭ ۇستەمدىگىن قورعاۋعا ارنالعان بۇل ۇيىم ءجۇز مىڭداعان ازەربايجاننىڭ قۇقىعىن قالپىنا كەلتىرۋگە كومەكتەسەدى دەپ شىن جۇرەكتەن ۇمىتتەندى جانە كۇتتى.

ازەربايجاننىڭ اۋماقتىق تۇتاستىعى مەن ەگەمەندىگىن قالپىنا كەلتىرگەننەن كەيىن، ءبىز ازەربايجان حالقى ۇزاق ۋاقىت بويى باس تارتقان رەسپۋبليكانىڭ ادىلەتتىلىكتى قالپىنا كەلتىرۋ جەتىستىكتەرىنە كولەڭكە ءتۇسىرىپ، ازەربايجاندى قارالاۋ ءۇشىن ۇيىمداستىرىلعان جالا جابۋ ناۋقانىنا تاپ بولدىق. 20 جىلعا جۋىق ۋاقىت بويى بىزگە ە ك پ ا قاقتىعىستارعا قاتىستى ماسەلەلەردى تالقىلاۋ ءۇشىن قولايلى فورمات ەمەس دەپ ايتىلدى. ءبىراق قازىر سول ە ك پ ا مەن سول دەپۋتاتتار مۇلدە كەرىسىنشە ايتىپ، ازەربايجانعا شابۋىل جاساۋدىڭ بىردە-ءبىر مۇمكىندىگىن جىبەرمەيدى.

ازەربايجان دەلەگاتسياسى ە ك پ ا- داعى ءوزارا ءىس-قيمىلىن جانە قاتىسۋىن كەلەسى ەسكەرتۋگە دەيىن توقتاتۋ تۋرالى شەشىم قابىلدادى، - دەپ حابارلادى دەلەگاتسيا مۇشەلەرى ءوز سوزىندە.

مالىمدەمە وقىلعان سوڭ دەلەگاتسيا زالدان شىعىپ كەتكەن.

ەستەرىڭىزگە سالا كەتەيىك، 22-قاڭتاردا گەرمانيا پارلامەنتىنىڭ دەپۋتاتى فرانك شۆابە جانە تاعى 22 پارلامەنتاري ەلدىڭ ۇيىم قاعيداتتارىن بۇزعانى ءۇشىن ازەربايجان دەلەگاتسياسىنىڭ وكىلەتتىكتەرىن شەكتەۋگە داۋىس بەرگەن بولاتىن.

اۆتور

ەركەجان سماعۇلوۆا