ازەربايجان فرانسيا ىشكى ىستەر باسشىسىنان كەشىرىم سۇراۋدى تالاپ ەتتى

استانا. KAZINFORM - ازەربايجان رەسپۋبليكاسىنىڭ سىرتقى ىستەر مينيسترلىگى فرانسيانىڭ ىشكى ىستەر ءمينيسترى جەرار دارمانەننىڭ جاڭا كالەدونيا ىستەرىنە ارالاسۋ تۋرالى ايىپتاۋلارىن جوققا شىعاردى. سوڭعى كۇندەرى اتالعان ايماقتا جاپپاي نارازىلىقتار باسىلماي تۇر.

«ءبىز فرانسيانىڭ ىشكى ىستەر ءمينيسترى جەرار دارمانەننىڭ ازەربايجانعا قارسى كەزەكتى مالىمدەمەسىن جانە ازەربايجان مەن جاڭا كالەدونيانىڭ تاۋەلسىزدىك قوزعالىسىنىڭ جەتەكشىلەرى اراسىنداعى 2024 -جىلدىڭ 16-مامىرىندا «فرانسيا-2» تەلەارناسىنا بەرگەن سۇحباتىندا جاسالعان بولجامدى بايلانىستاردى تولىعىمەن جوققا شىعارامىز»، - دەلىنگەن ازەربايجان رەسپۋبليكاسى سىرتقى ىستەر مينيسترلىگىنىڭ باسپا ءسوز قىزمەتىنىڭ باسشىسى ايحان گادجيزادەنىڭ مالىمدەمەسىندە.

مينيسترلىك سونىمەن قاتار فرانسيانى ازەربايجانعا قاتىستى باسقا دا نەگىزسىز كىنا تاعۋدى توقتاتۋعا شاقىردى.

كەيىنىرەك ايحان گادجيزادە جۋرناليستەردىڭ ساۋالىنا جاۋاپ بەرە وتىرىپ، ازەربايجاندى ديكتاتور ەل رەتىندە رەتىندە تانىعان فرانسۋز ءمينيسترىنىڭ سوزدەرىنە تۇسىنىكتەمە بەردى.

«فرانسيانىڭ ازەربايجانعا قارسى جاساعان مۇنداي مالىمدەمەلەرى اقىلعا قونبايدى جانە ءبىز وعان ءۇزىلدى-كەسىلدى قارسىلىق تانىتىپ جاتىرمىز»، - دەدى ا. گادجيزادە.

ونىڭ ايتۋىنشا، ازەربايجاندا نەگىزگى قۇقىقتار مەن بوستاندىقتار تولىق قامتاماسىز ەتىلگەن. ەلدە ءارتۇرلى ۇلت پەن ءدىن ۇستاعان ادامدار جايلى جانە قاۋىپسىز جاعدايدا بىرگە ءومىر سۇرەدى.

«فرانسۋز تاراپى بۇل مالىمدەمە ءۇشىن كەشىرىم سۇراۋى كەرەك. ايتپەسە، بۇل «ازەربايجان- فرانسۋز» قاتىناسىنا ودان ءارى كەرى اسەر ەتەدى»، - دەلىنگەن باسپا ءسوز حاتشىسىنىڭ مالىمدەمەسىندە.

ەسكە سالا كەتسەك، فرانسيا جاڭا كالەدونياداعى تارتىپسىزدىكتەرگە بايلانىستى توتەنشە جاعداي جاريالاعان ەدى.

فرانسيا 15- مامىر سارسەنبى كۇنى تاڭعى 5-تەن باستاپ جاڭا كالەدونيادا توتەنشە جاعداي جاريالادى، بۇل بيلىككە جينالىستارعا تىيىم سالۋ جانە ادامداردىڭ ارالدا جۇرۋىنە تىيىم سالۋ ءۇشىن قوسىمشا وكىلەتتىكتەر بەردى.

10 جىل بويى جاڭا كالەدونيادا تۇراتىن كالەدوندىق ەمەس فرانسيا ازاماتتارىنا جەرگىلىكتى سايلاۋدا داۋىس بەرۋگە مۇمكىندىك بەرەتىن فرانسۋز پارلامەنتى قابىلداعان زاڭ جوباسى تارتىپسىزدىكتەردىڭ باستى سەبەبى بولدى.

جاڭا كالەدونيا - تىنىق مۇحيتىنىڭ وڭتۇستىك- باتىسىندا، اۋستراليادان شىعىسقا قاراي شامامەن 1500 ك م جەردە ورنالاسقان ارالدار توبى. ارالدار 1853 -جىلدان بەرى فرانسۋزداردىڭ باقىلاۋىندا. 1946 -جىلى جاڭا كالەدونيا شەتەلدەگى اۋماق مارتەبەسىن الدى.

اۆتور

داۋلەت ىزتىلەۋ