ازاماتتىق الاتىندار قازاق ءتىلىن بىلۋگە مىندەتتى: مينيسترلىك تەست دايىندايدى

استانا. KAZINFORM – ق ر عىلىم جانە جوعارى ءبىلىم ءمينيسترى ساياسات نۇربەك مينيسترلىك قازاقستان ازاماتتىعىن العىسى كەلەتىن شەتەلدىكتەرگە ارنالعان تەستىلەردى دايارلاۋعا كىرىسەتىنىن ايتتى.

اتاپ ايتقاندا، مەملەكەتتىك ءتىلدى قاراپايىم دەڭگەيدە، سونداي- اق ەلىمىزدىڭ تاريحى مەن كونستيتۋتسياسىنىڭ نەگىزدەرىن بىلمەگەن جاعدايدا، ازاماتتىق بەرىلمەيدى. ال ءتىلدى ءبىلۋدىڭ ءتيىستى دەڭگەيىن عىلىم جانە جوعارى ءبىلىم مينيسترلىگى ايقىندايدى.

بۇل تۇرعىدا بۇگىن ۇكىمەتتە وتكەن باسپا ءسوز ءماسليحاتىندا تىلشىلەر مينيستردەن اتالعان تەستىلەر قاشان دايىن بولاتىنىن سۇرادى.

ءوز كەزەگىندە س. نۇربەك كوشى-قون زاڭناماسىنا وزگەرىستەر بەكىتىلگەنىن ەسكە سالدى.

«ەندى ازاماتتىقتى الۋ ءۇشىن تەست تاپسىرۋ كەرەك. بۇل الەم ەلدەرىندەگى قالىپتى تاجىريبە، ياعني ا ق ش، كانادا، گەرمانيا، تۇركيادا، رەسەيدە وسىنداي ءتارتىپ بار. بىزدەگى تەستىنىڭ ءۇش كومپونەنتى بولادى. مەملەكەتتىك - قازاق ءتىلىن مەڭگەرۋ، كونستيتۋتسيا نەگىزدەرى مەن قازاقستان تاريحىن ءبىلۋ ەسكەرىلگەن. قازىر ارنايى جۇمىس توبىن قۇرىپ جاتىرمىز. ءتيىستى ەرەجە مەن وسى تەستىلەر ازىرگە دايىن ەمەس. وسى تەستىنى دايىنداۋ كەرەك»، - دەدى ۆەدومستۆو باسشىسى.

ول بۇل جۇمىستاردىڭ جەدەل تارتىپتە ىسكە اسىرىلاتىنىن ايتتى.

بۇدان بۇرىن حابارلانعانداي، بيىل قىستا پارلامەنتتە كوشى-قون سالاسىنداعى زاڭنامانى جەتىلدىرۋگە ارنالعان زاڭ قارالدى. ونىڭ اياسىندا ەندى قازاقستان رەسپۋبليكاسىنىڭ ازاماتتىعىن العىسى كەلەتىن شەتەلدىكتەر قازاق ءتىلىن بىلۋگە مىندەتتى بولادى.

جاقىندا پرەزيدەنت كوشى-قون جانە ق ا ج سالالارىنداعى زاڭنامانى جەتىلدىرۋ تۋرالى زاڭعا قول قويدى.

اۆتور

رۋسلان عابباسوۆ