AZAL رەسەيدىڭ بىرنەشە قالاسىنا رەيستەرىن ۋاقىتشا توقتاتادى

استانا. KAZINFORM - بۇل تۋرالى اۋەتاسىمالداۋشىنىڭ باسپا ءسوز قىزمەتى حابارلادى.

Azerbaijan Airlines (AZAL) رەسەيدىڭ كەيبىر قالالارىنا رەيستەرىن توقتاتتى.

- 25 -جەلتوقساندا بولعان Embraer 190 ۇشاعىنىڭ اپاتىنا قاتىستى تەرگەۋدىڭ باستاپقى دەرەكتەرىن، سونداي-اق مينەرالنىە ۆودى، سوچي، ۆولگوگراد، ۋفا، سامارا، گروزنىي قالالارىنا ۇشۋ قاۋىپسىزدىگىن قامتاماسىز ەتۋ سالاسىنداعى ىقتيمال تاۋەكەلدەردى ەسكەرە وتىرىپ جانە ماحاچكالادا 28-جەلتوقساننان باستاپ ءىس جۇرگىزۋ تۇپكىلىكتى اياقتالعانعا دەيىن رەيستەر توقتاتىلدى، - دەلىنگەن حابارلامادا.

بۇعان دەيىن AZAL اۋە كومپانياسىنىڭ J2-8717 رەيسى باكۋ -مينەرالنىە ۆودى باعىتى بويىنشا ۇشقاننان كەيىن، باكۋ اۋە كەڭىستىگىنەن شىقپاي-اق جانە ماحاچكالا اۋە كەڭىستىگىن جابۋ تۋرالى حابارلامانى العان سوڭ، كەرى قايتۋ تۋرالى شەشىم قابىلداعان بولاتىن. ۇشاق جەرگىلىكتى ۋاقىت بويىنشا 10:13-تە گەيدار اليەۆ حالىقارالىق اۋەجايىنا امان-ەسەن قوندى.

25 -جەلتوقسان كۇن باكۋدەن گروزنىيعا بەت العان ازەربايجاننىڭ Azerbaijan Airlines كومپانياسىنىڭ Embraer ۇشاعى قازاقستاننىڭ اقتاۋ قالاسىنا جاقىن جەردە اپاتقا ۇشىرادى. ۇشاق بورتىندا 67 ادام، ونىڭ ىشىندە بەس ەكيپاج مۇشەسى بولعان. وقيعا سالدارىنان 38 جولاۋشى قازا تاۋىپ، 29 ادام، ونىڭ ىشىندە ءۇش بالا امان قالدى.

ازەربايجان پرەزيدەنتى يلحام الييەۆتىڭ جارلىعىمەن 2024 -جىلدىڭ 26-​​جەلتوقسانى ازەربايجاندا ۇشاق اپاتىندا قازا تاپقانداردى ەسكە الىپ، ازا تۇتۋ كۇنى بولىپ جاريالاندى.

اقتاۋعا Embraer اۋە كەمەسىن ءوندىرۋشى زاۋىتتان ارنايى وكىلدەر كەلگەنىن جازعان بولاتىنبىز.

ەركەجان سماعۇلوۆا

اۆتور