گازاداعى بەيبىت تۇرعىنداردىڭ ءولىمىن توقتاتۋىمىز كەرەك - جوزەپ بوررەل

ەۋروپا وداعىنىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەل ءوزىنىڭ ليۆان مەن ساۋد ارابياسىنا ساپارىنىڭ قورىتىندىسى بويىنشا مالىمدەمە جاسادى، دەپ حابارلايدى Kazinform اگەتتىگىنىڭ مەنشىكتى ءتىلشىسى.

«ءۇش اي وتكەن سوڭ تاياۋ شىعىسقا قايتا ورالدىم. وسى ارالىقتا قايعىلى وقيعا «حاماس» تەراكتىلەرىنەن باستالىپ، كەيىن گازانى بومبالاۋمەن جالعاستى. سونىڭ سالدارىنان كوپتەگەن بەيبىت تۇرعىن قۇربان بولدى. جاقىندا بەيرۋتكە، سودان كەيىن ەر-ريادقا ساپارلادىم. بۇل رەتتە، ەكى ماسەلەگە قاتىستى وي ءتۇيدىم. بىرىنشىدەن، گازا تۇرعىندارىنىڭ گۋمانيتارلىق جاعدايى ۋشىعىپ تۇر. بەينەكونفەرەنسيا وتكىزىپ، ب ۇ ۇ- نىڭ تاياۋ شىعىستاعى پالەستينالىق بوسقىندارعا كومەكتەسۋ جونىندەگى اگەنتتىكتىڭ باس ديرەكتورى فيليپپ لازاريني مەن ونىڭ گازاداعى قىزمەتكەرلەرىنەن ءبىراز اقپارات الدىم. جاعداي وتە قيىن، جۇزدەگەن مىڭ ادام باسپاناسىنان ايىرىلىپ، ازىق-تۇلىك تاپشىلىعى بايقالىپ وتىر. ەكىنشىدەن، ايماقتاعى شيەلەنىس قاۋپى جوعارى، ياعني ليۆان مەن يزرايل شەكاراسىندا، سونداي- اق قىزىل تەڭىز ايماعىندا جاعداي كۇردەلەنە ءتۇسۋى مۇمكىن. بۇعان توسقاۋىل قويۋ ماڭىزدى. ءبىز سوعىستىڭ ورشۋىنە جول بەرمەۋىمىز قاجەت. سوعىستى ۋشىقتارماي، توقتاتۋ كەرەك. قاقتىعىستىڭ ۋشىعا تۇسۋىنە جول بەرمەۋدىڭ جالعىز شەشىمى - يزرايل مەن پالەستينا اراسىنداعى شيەلەنىستىڭ ساياسي شەشىمىن ىزدەۋ»، - دەدى جوزەپ بوررەل.

ول ساۋد ارابياسىنىڭ سىرتقى ىستەر ءمينيسترى فەيسال بين فارحان ءال-ساۋدپەن وسى ماسەلە بويىنشا كەلىسسوز جۇرگىزگەنىن ايتتى. سونىمەن قاتار ول يزرايل مەن پالەستينا اراسىندا ءتيىستى شەشىمدەر ورىندالۋى كەرەك ەكەنىن جانە ساياسي كەلىسىم ارقىلى عانا بۇل شيەلەنىستى شەشۋگە بولاتىنىن ايتتى.

«گازا سەكتورىندا بەيبىت تۇرعىنداردىڭ قانى توگىلىپ جاتىر، وسىنى توقتاتۋىمىز كەرەك. «حاماستى» جويۋ كەرەك. ءبىراق «حاماس» - بۇل يدەيا، ال يدەيانى بىردەن جويا المايسىڭ. اتاپ ايتقاندا، جامان يدەيانى جويۋدىڭ جالعىز جولى - جاقسىسىن ۇسىنۋ. سوندىقتان پالەستينا حالقىنا، ونىڭ قادىر-قاسيەتىنە، بوستاندىعىنا مەن قاۋىپسىزدىگىنە جاڭا مۇمكىندىكتەر بەرۋ كەرەك. بۇل قادامدار يزرايلدىڭ قاۋىپسىزدىگىن قامتاماسىز ەتۋمەن قاتار ىسكە اسىرىلۋى ءتيىس»، - دەدى ەو جوعارعى وكىلى.

دەگەنمەن ج. بوررەل بۇعان قول جەتكىزۋ قيىن بولاتىنىن مويىندادى.

«مەن بريۋسسەلگە وسى باعىتتا جۇمىس ىستەۋگە جانە ايماقتاعى قاقتىعىستى ۋشىقتىرۋعا جول بەرمەۋگە مىندەتتەمە الىپ ورالامىن. ليۆانمەن شەكارادا سوعىس اشۋعا ەشكىم دە مۇددەلى ەمەس، سونداي- اق قىزىل تەڭىزدەگى كولىك قوزعالىسىنا قاۋىپ ءتوندىرۋى دە ەشقايسىسىنا كەرەك ەمەس. مۇمكىن وسىنداي شيەلەنىس بىرەۋدىڭ مۇددەسىنە ساي كەلەتىن شىعار، ءبىراق بۇكىل ادامزات قاقتىعىستىڭ ۋشىعۋىن قالامايتىنى انىق»، - دەدى ەۋروپالىق ديپلومات.

اۆتور

رۋسلان عابباسوۆ