گازادا سوعىس باستالعالى ەنتوني بلينكەن تاياۋ شىعىسقا 11- رەت بارا جاتىر
استانا. KAZINFORM - ا ق ش مەملەكەتتىك حاتشىسى ەنتوني بلينكەن دۇيسەنبى كۇنى ءبىر اپتالىق ساپارمەن يزرايلگە جانە بىرنەشە اراب ەلدەرىنە بارادى.
ونىڭ ساپارى سونداي-اق يزرايلدىڭ وسى ايدىڭ باسىندا بالليستيكالىق زىمىراندىق شابۋىلى ءۇشىن يرانعا جاۋاپ قايتارۋ مۇمكىندىگىن قاراستىرۋىمەن تۇسپا-تۇس كەلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ا ق ش- تىڭ مەملەكەتتىك حاتشىسى ەنتوني بلينكەن دۇيسەنبى كۇنى يزرايل مەن وزگە دە ءبىرقاتار اراب ەلدەرىنە ءبىر اپتاعا ءىسساپارعا بارادى.
ونىڭ تاياۋ شىعىسقا ساپارى وتكەن اپتادا ا ق ش پرەزيدەنتى دجو بايدەن يزرايلدىڭ حاماس اسكەري ۆەدومستۆوسىنىڭ باسشىسى ياحيا سينۆاردى ولتىرگەننەن كەيىن بلينكەندى ايماققا جىبەرەتىنىن مالىمدەگەننەن كەيىن كۇتىلگەن ەدى. شولۋشىلاردىڭ پىكىرىنشە، بۇل بىرنەشە اي بويى كەيىنگە قالدىرىلعان اتىستى توقتاتۋ ۇسىنىسى بويىنشا جاڭا كەلىسسوزدەرگە اپاراتىن قادام بولۋى مۇمكىن.
بلينكەننىڭ ءوزى يزرايلگە جانە ايماقتاعى باسقا ەلدەرگە «گازاداعى سوعىستى توقتاتۋ، كەپىلگە الىنعانداردى وتباسىلارىنا قايتارۋ جانە پالەستينا حالقىنىڭ قايعى-قاسىرەتىن جەڭىلدەتۋ ماڭىزدىلىعىن قارقىندى تالقىلاۋ ءۇشىن» باراتىنىن مالىمدەدى.
مەملەكەتتىك دەپارتامەنت ونىڭ ساپارى يزرايلدەن باستالاتىنىن حابارلادى، ءبىراق باسقا ناقتى باعىتتاردى اتاعان جوق. سەيسەنبىدە بلينكەن يزرايل پرەمەر-ءمينيسترى بينيامين نەتانياحۋمەن جانە پرەزيدەنت يتسحاك گەرتسوگپەن كەزدەسەدى.
«ايماقتا بلينكەن قاقتىعىس اياقتالعان جاعدايداعى جوسپارلار مەن «پالەستينالىقتارعا ءوز ءومىرىن قالپىنا كەلتىرۋگە مۇمكىندىك بەرەتىن جاڭا جولدى دامىتۋ قاجەتتىلىگىن» تالقىلايدى»، - دەدى مەملەكەتتىك دەپارتامەنتتىڭ وكىلى مەتيۋ ميللەر.
اۆتور
زارينا تۋعانبايەۆا
