گازا سەكتورىنداعى ۇيلەردىڭ 92 پايىز قيراعان

استانا. KAZINFORM - گازا سەكتورىنىڭ ينفراقۇرىلىمىن قالپىنا كەلتىرۋگە بىرنەشە جىل قاجەت. بۇل تۋرالى 24.kz سايتى جازدى.

ب ۇ ۇ- نىڭ وكىلدەرى وسىلاي دەپ وتىر. قارۋلى قاقتىعىستان، اسىرەسە، ءوڭىردىڭ سولتۇستىك اۋداندارى قاتتى زارداپ شەككەن. اتىس-شابىس سالدارىنان گازاداعى ۇيلەردىڭ %92- ءى قيراعان. ونىڭ ىشىندە 160 مىڭ باسپانا جەرمەن جەكسەن بولسا، 276 مىڭى بۇلىنگەن. سونىڭ سالدارىنان تۇرعىنداردىڭ كوبى قازىر ۋاقىتشا قۇرىلعان شاتىرلاردا تۇرۋعا ءماجبۇر.

ەسكە سالا كەتەيىك، بۇعان دەيىن قۇتقارۋشىلار اتىس توقتاعاننان بەرى گازا سەكتورىنداعى ءۇيىندى استىنان 162 ادامنىڭ ءمايىتىن شىعارعانىن جازعان بولاتىنبىز.

گازا سەكتورى قول-اياعى امپۋتاتسيالانعان بالالار سانى بويىنشا الەمدە ءبىرىنشى ورىنعا شىقتى.