از ۇيقى ويلاۋ جىلدامدىعىن تەجەيدى

استانا. قازاقپارات - اسىعىس زاماندا ۋاقىتتىڭ قۇنى جوعارى. ونى ۇنەمدەۋ ماقساتىندا تالاي پايدالى ىستەردەن باس تارتىپ، بار ۋاقىتىمىز بەن كۇشىمىزدى جۇمىسقا بەرەمىز. الايدا عالىمدار ۇيقىعا قاجەتتى ۋاقىت بولمەيتىندەر جۇمىستا ءساتسىز بولاتىنىن دالەلدەدى.

ءارقايسىمىز دا مۇمكىندىگىمىزشە از ۋاقىت ۇيىقتاپ، بوس ۋاقىتتى پايدالى شارۋالارعا قۇرتۋعا تىرىسامىز. ءبىراق ۇيقىنىڭ ازدىعى جۇمىستاعى ناتيجەلىلىككە تىكەلەي قاتىستى ەكەن.

بوستوندىق عالىمدارىنىڭ ايتۋىنشا، ۇيقىڭىزدىڭ قانعانىن سەزىنۋ ونىڭ قاجەتتى مولشەرىنىڭ كورسەتكىشى ەمەس ەكەن. ۇزاعىراق ۇيىقتاعان سايىن، ءسىز بەلسەندى، ەڭبەكقور، ءتۇرلى جاعدايلاردا تەز شەشىم تابا الاتىن ادام بولاسىز.

«ءبىزدىڭ عالىمدار توبى ۇيقىنىڭ ازدىعى اۋە كولىگىن باسقارۋ، ەلەكتروستانسياداعى مەحانيزمدەردى باقىلاۋ جانە باسقا دا قيىن جۇمىستاردى ورىنداۋعا قالاي اسەر ەتەتىنىن زەرتتەدى. بۇنداي جۇمىس تۇرلەرى جادىنىڭ قايتا، تەز كودتالۋىن، ۆيزۋالدى اقپاراتتى ىزدەۋ، شەشىمدەر قابىلداۋدى تالاپ ەتەدى. ال از ۇيىقتاعان سايىن، بۇل قاسيەتتەر ازايادى»، - دەپ پىكىرىن ايتتى زەرتتەۋ اۆتورى جاننا داففي.

ءبىر اي بويى عالىمدار 12 ادامدى باقىلاۋعا الدى. ءبىرىنشى اپتادا ولارعا 10-12 ساعات ۇيىقتاۋعا رۇقسات ەتىلدى. ال كەلەسى 3 اپتا بويى ولار كۇندەلىكتى تەك 5،5 ساعات ۇيىقتاپ ءجۇردى.

ادامدار از ۇيىقتاعان كۇندەرى ءوز جۇمىسىن باياۋ ورىنداعان. ۋاقىت وتە كەلە، جۇمىسشىلار بۇل ۇيقى تارتىبىنە ۇيرەنىپ، از ۇيىقتاعاندارىنا ەش شاعىمدانباعان. زەرتتەۋ ادامنىڭ ۇيقىسى قانعاندىعىن، ناتيجەسىندە ءوزىنىڭ ەڭبەككە جارامدىلىعىن دا باعالاي المايتىندىعىن كورسەتتى.

ادام از ۇيىقتاعان سايىن ونىڭ ەڭبەككە جارامدىلىعى ازايادى. ۇيقىنىڭ ازدىعى ويلاۋ جىلدامدىعىن كەمىتەدى ەكەن.

massaget.kz