ايىپپۇل تابىسىمىزعا تۋرا كەلە مە، جوق پا دەگەن سۇراق بولماۋ كەرەك - تامارا دۇيسەنوۆا

استانا. KAZINFORM - پرەمەر-ءمينيستردىڭ ورىنباسارى تامارا دۇيسەنوۆا ۇكىمەت وتىرىسىنان كەيىن وتكەن باسپا ءسوز ءماسليحاتىندا ايىپپۇلدار مولشەرلەمەسى مەن حالىق تابىسىنىڭ اراسىنداعى بالانس تۋرالى پىكىر ءبىلدىردى.

- قازاقستاندا ايىپپۇل مولشەرى حالىقتىڭ تابىسىنا پروپورتسيونالدى ەمەس دەگەن پىكىر كوپ. قۇقىق قورعاۋ ورگاندارى وسى ايىپپۇلداردى بەلگىلەگەندە سىزدەرمەن اقىلداسا ما؟ ايىپپۇل مولشەرى حالىقتىڭ تابىسىنا ساي ادىلەتتى دەپ ويلايسىز با؟ - دەپ سۇرادى ب ا ق وكىلى.

ۆيتسە-پرەمەر ونداي سۇراقتىڭ ءوزى ورىنسىز دەپ ەسەپتەيتىنىن ايتتى.

- ەگەر ازاماتتار زاڭدى بۇزباسا، ەشكىم ەشكىمنىڭ قالتاسىنا تۇسپەيدى. سوندىقتان، ايىپپۇل ءبىزدىڭ تابىسىمىزعا تۋرا كەلە مە، جوق پا دەگەن سۇراقتى قويماۋ كەرەك. مەنىڭشە، ءبىز «زاڭدى بۇزباۋىمىز كەرەك» دەپ سۇراق قويۋ كەرەك شىعار. ءبىزدىڭ العا قويعان ماقساتىمىز - زاڭدى بۇزىپ، ايىپپۇلدىڭ كولەمىن انىقتاۋ ەمەس قوي، - دەدى ول.

تامارا دۇيسەنوۆا ايىپپۇل ەلدە زاڭنىڭ ساقتالۋى ءۇشىن قولدانىلاتىن شارا ەكەنىن ەسكە سالدى.

- ءبىزدىڭ ايىپپۇلدار نە ءۇشىن سالىنادى؟ بىرىنشىدەن، قوعامدىق قاۋىپسىزدىكتى نەمەسە جول قاۋىپسىزدىگىن ساقتاۋ ءۇشىن، ۇلتتىق قاۋىپسىزدىك ساقتاۋ ءۇشىن سالىنادى. ەگەر وسى ماسەلەلەر بويىنشا زاڭدى تىڭدايتىن ازامات بولساق، بىزگە ەشكىم ەشقانداي ايىپپۇل سالمايدى. ايىپپۇل ءبىزدىڭ تابىسىمىزعا تۋرا كەلۋ كەرەك، كەلمەۋ دەگەن ماسەلە دۇرىس ەمەس. سالىققا كەلەر بولسا، ول ءبىزدىڭ تابىسقا بايلانىستى بولادى. سەبەبى تابىستىڭ 90 پايىزىن سالىققا بەرە المايمىز عوي. ءوزىمىز ءوسۋىمىز كەرەك، - دەدى ۆيتسە- پرەمەر.

ەسىمجان ناقتىباي

اۆتور