مايمىل شەشەگى: شەكارادا سانيتاريالىق باقىلاۋ كۇشەيتىلدى

مينيسترلىكتىڭ باسپا ءسوز قىزمەتىنىڭ حابارلاۋىنشا، ۆەدومستۆو الەمدەگى ينفەكسيالىق اۋرۋلاردىڭ، ونىڭ ىشىندە مايمىل شەشەگىنىڭ ەپيدەميولوگيالىق جاعدايىنا تۇراقتى مونيتورينگ جۇرگىزىپ كەلەدى. الەمنىڭ جەكەلەگەن ەلدەرىندە اۋرۋ جاعدايلارىنىڭ تىركەلۋى جانە حالىقارالىق كولىك قاتىناستارىنىڭ بەلسەندىلىگى ينفەكسيانىڭ قازاقستانعا اكەلىنۋ ىقتيمالدىعىن جوققا شىعارمايدى. سونىمەن قاتار قوزدىرعىشتىڭ بەرىلۋ ەرەكشەلىكتەرىن ەسكەرە وتىرىپ، ەل حالقى اراسىندا اۋرۋدىڭ كەڭىنەن تارالۋ قاۋپى تومەن دەپ باعالانىپ وتىر.

ينفەكسيانىڭ ەلگە اكەلىنۋى مەن تارالۋىنىڭ الدىن الۋ ماقساتىندا قازاقستان رەسپۋبليكاسى باس مەملەكەتتىك سانيتاريالىق دارىگەرىنىڭ 2024 -جىلعى 26-تامىزداعى № 8 قاۋلىسىنا سايكەس سانيتاريالىق-پروفيلاكتيكالىق جانە ەپيدەمياعا قارسى ءىس-شارالار كەشەنى جۇرگىزىپ جاتىر.

اتاپ ايتقاندا، مەملەكەتتىك شەكاراداعى وتكىزۋ پۋنكتتەرىندە سانيتاريالىق-كارانتيندىك باقىلاۋ كۇشەيتىلدى. اۋرۋ جاعدايلارى تىركەلگەن ەلدەردەگى ەپيدەميولوگيالىق جاعدايعا جانە وسى مەملەكەتتەردەن كەلگەن ازاماتتارعا مونيتورينگ جۇرگىزىلىپ جاتىر. بارلىق وتكىزۋ پۋنكتتەرى مەن سانيتاريالىق-كارانتيندىك پۋنكتتەر دەنە تەمپەراتۋراسىن جاناسپاي ولشەيتىن قۇرالدارمەن جابدىقتالعان.

سونىمەن قاتار مەديسينالىق ۇيىمدار مەن زەرتحانالاردىڭ ينفەكسيانى ۋاقتىلى انىقتاۋعا جانە دياگنوستيكالاۋعا دايىندىعى قامتاماسىز ەتىلۋ ۇستىندە. اسا قاۋىپتى ينفەكسياعا كۇدىك تۋىنداعان جاعدايدا حابارلاۋ جانە ۆەدومستۆوارالىق ءوزارا ءىس-قيمىل جاساۋ الگوريتمدەرى بەكىتىلىپ، قولدانىسقا ەنگىزىلگەن.

ەپيدەميولوگيالىق جاعدايعا بايلانىستى ەرەكشە نازار اۋدارۋدى قاجەت ەتەتىن ەلدەردىڭ تىزبەسى الەمدەگى احۋالدىڭ وزگەرۋىنە قاراي تۇراقتى تۇردە جاڭارتىلىپ وتىرادى. كولىكتىڭ بارلىق تۇرىندە جۇرگىزىلگەن سانيتاريالىق-كارانتيندىك باقىلاۋ ناتيجەسىندە اسا قاۋىپتى ينفەكسيالارمەن اۋىرعان نەمەسە ولارعا كۇدىك تۋدىراتىن ادامدار انىقتالعان جوق.

مايمىل شەشەگى - MPXV ۆيرۋسى قوزدىراتىن ۆيرۋستىق اۋرۋ. ينفەكسيا نەگىزىنەن جۇقتىرعان اداممەن تىعىز فيزيكالىق بايلانىس كەزىندە، سونىڭ ىشىندە تەرىدەگى بورتپەلەرمەن جانە بيولوگيالىق سۇيىقتىقتارمەن جاناسۋ ارقىلى بەرىلەدى. سونداي-اق لاستانعان كيىم، توسەك-ورىن جابدىقتارى مەن باسقا دا زاتتار ارقىلى، سونداي-اق ينفەكسيا جۇقتىرعان جانۋارلارمەن بايلانىستا بولعان كەزدە جۇعۋى مۇمكىن.

اۋرۋدىڭ نەگىزگى بەلگىلەرىنە دەنە قىزۋىنىڭ كوتەرىلۋى، باس اۋرۋى، بۇلشىقەتتەردىڭ اۋىرۋى، ليمفا تۇيىندەرىنىڭ ۇلعايۋى جانە تەرى بورتپەلەرى جاتادى.

ينفەكسيانىڭ الدىن الۋ ءۇشىن دەنساۋلىق ساقتاۋ مينيسترلىگى تەرىسىندە سەبەبى بەلگىسىز بورتپەلەرى نەمەسە باسقا دا ينفەكسيالىق اۋرۋ بەلگىلەرى بار ادامدارمەن تىعىز فيزيكالىق بايلانىستان اۋلاق بولۋدى جانە جەكە باس گيگيەناسى قاعيدالارىن ساقتاۋدى ۇسىنادى. سونداي-اق ينفەكسياعا كۇدىك تۋدىراتىن ادامداردىڭ جەكە زاتتارىن، كيىمدەرى مەن توسەك-ورىن جابدىقتارىن ورتاق پايدالانباۋ قاجەت.

- اۋرۋعا ءتان بەلگىلەر پايدا بولعان جاعدايدا، اسىرەسە اۋرۋ تىركەلگەن ەلدەرگە بارعاننان كەيىن، ۋاقتىلى مەديسينالىق كومەككە جۇگىنىپ، مەديسينا قىزمەتكەرىنە ساپارلار مەن ىقتيمال بايلانىستار تۋرالى حابارلاۋ كەرەك، - دەلىنگەن حابارلامادا.

دەنساۋلىق ساقتاۋ مينيسترلىگى ەپيدەميولوگيالىق جاعدايعا مونيتورينگ جۇرگىزۋدى جالعاستىرىپ، حالىقتىڭ دەنساۋلىعىن ساقتاۋ جانە ەلدەگى سانيتاريالىق- ەپيدەميولوگيالىق سالاماتتىلىقتى قامتاماسىز ەتۋ ءۇشىن قاجەتتى شارالاردى قابىلداپ جاتىر.

وسىعان دەيىن رەسەيدىڭ سانكت-پەتەربۋرگ قالاسىندا مايمىل شەشەگىن جۇقتىردى دەگەن كۇدىكپەن بەس ادام اۋرۋحاناعا جەتكىزىلگەنى تۋرالى جازدىق.