ايتىستاعى ءبىر قايىرىم. قۇرمانبەك زەيتىنعازى ۇلى
ولەڭنىڭ بوساعاسىن اتتاعالى، ەش ايتىپ كورگەمىن جوق جاتتامانى.
ويتكەنى، جاتتاماعا كىم اكەلىپ -
جاماۋىن ەسكى-قۇسقى باتتامادى.
اقىننىڭ اقىن ەمەس ايقاي قۋىپ،
جارامدى ءسوز جاقسىسىن تاپپاعانى.
اسىل جىر ەل اۋزىندا ساقتالادى.
تالاپتى بوزبالالار جاتقا الادى.
بىلمەسە قازاق ماقال قالدىرا ما،
«ۇستادان توت، ۇستازدان حات قالادى».
ۇزاق ءومىر سۇرە الماس بولبىر ولەڭ،
قۇلاققا قالا بەرەر جاقپاعانى.
تاسى ورگە ونەرپازدىڭ دومالاي ما؟
جىگىتتىڭ ەكى نارسە باق، تالابى:
اقىماق ادال جانعا قاس سايلاسا،
الدىم دەپ اياعىنان ماقتانادى.
اق ءدامىن قولدان بەرگەن اقتاعانى -
ءيتتىڭ دە ءوز يەسىن قاپپاعانى.
ىستەلسە ءادىل سوزگە ازازىلدىك،
قۇدايدىڭ ناق پالەدەن قاقپاعانى.
اسپا تۇزاق باساتىن ابايلاماي،
ادامنىڭ دا بولادى اقمارالى.
اۋىزدان ءبىر شىققان سوڭ ۇستاي الماس،
جەل ءسوزىنىڭ الدى-ارتىن باقپاعانى.
جاسىمدا جىگىت-جەلەڭ ولەڭ بوپتى،
ارۋدىڭ المامويىن، اقتاماعى.
نەدەگەن ايانىشتى ادال تەردىڭ،
جەمىسىن وڭگە بىرەۋ تاپتاعانى!
بولسا دا وسى ولەڭنەن سۋىنعام جوق،
ۇرپاقتار بىرەر ۇلگى اپ قالادى.
جاماننان اقىن ءجابىر كورىپ ەم دەپ،
ءجون بولار دوستى قاسقا ساتپاعانى.
ەسىندە كەيىنگىنىڭ ءسوزىم قالسا،
ءۇمىتى تۋعان ەلدىڭ اقتالادى.
جورعانىڭ سۋ توگىلمەس جورعاسى بار،
جۇيرىكتىڭ جۇلدە بەرمەس اقتابانى.
قاعازعا تۇسپەگەن ءسوز الماعايىپ،
اۋىزدان اۋزىعا وتكەن اتتامالى.
جەرىم جوق توي دەگەندە توپتان قالعان،
قالايشا جىر داپتەرىم اق قالادى؟!
كەۋدەم ءبىر كەرەمەتتەي جىر ساندىعى،
ءتىلىم - كىلىت، قۇپياسىن اقتارادى.
اۋىزىمنىڭ ساداعاسى جامان ولەڭ،
ايىرار سانام باردا اق-قارانى.
ولەڭىم - ەلىمە سىي، جانىم - قوناق
قالدىرىپ بار تاپقانىن اتتانادى.
ءبىر مۇرام جالعاسپاسا ماعان قارىز،
حالقىنىڭ قادىر تۇتىپ باپتاعانى.
جۇيرىكتىڭ نەگە كەرەك قان مايداندا،
ۇكىلەپ باپتاسا دا شاپپاعانى.
ايتىسقا ءتۇسىپ ءجۇرمىن، وزىمە ايان،
ەشكىمنىڭ شاۋجايىمنان قاقپاعانى.
باس قوسقان ءبىر توپ اقىن وتىرىستا،
وسى ەكەن قۇرمانبەكتىڭ تاپقان ءانى.
تالاپكەر باۋىرلارىم سۇراعان سوڭ،
اعانىڭ ەسكى اسىنان ساقتاعانى.
كەۋدەڭە التىن تىقساڭ كىم بىلەدى،
قاجەت قوي قاپ تۇبىندە جاتپاعانى.
ايتقاننىڭ ءبارى مىقتى دەي المايمىن،
ءار كورپە يەسىنە شاقتالادى.
تاباق ءبىر، تارازىدا سالماق باسقا،
تابادى حالىق - اينا، ناق باعانى.
دۇنيەدەن ارەكەتسىز وتكەن جامان،
سۋدىڭ دا ساسيدى ەكەن اقپاعانى!
ايت، ايت دەپ ۇلكەن-كىشى قولقالاسا،
ەلپەك ءتىل ەل بۇيرىعىن اتقارادى.
تالعاماي تىڭداۋشىسىن ايتقان ولەڭ،
باياعى ديۋانانىڭ شاتپاق ءانى.
كىم كەپىل، كەيبىرەۋدىڭ كۇلمەسىنە،
التايدىڭ مىناۋ ما دەپ ماقتاعانى؟!
