الماتى اۋەجايىنىڭ ەسكى تەرمينالىن جوندەۋگە 10 ميلليون دوللار جۇمسالماق
الماتى. KAZINFORM - الماتى اۋەجايىنىڭ جاڭا حالىقارالىق جولاۋشىلار تەرمينالىنىڭ قۇرىلىسى 87 پايىزعا ورىندالدى. بۇل تۋرالى حالىقارالىق الماتى اۋەجايىنىڭ پرەزيدەنتى الپ ەر تۋنگا ەرسوي مالىمدەدى.
«ءبىز جاڭا حالىقارالىق جولاۋشىلار تەرمينالىنىڭ قۇرىلىسىنا 200 ميلليون دوللاردان استام قاراجات جۇمسادىق، سونىمەن قاتار ءبىز تەك ىشكى رەيستەردى قابىلدايتىن قولدانىستاعى ەسكى تەرمينالدى جاڭارتۋعا شامامەن 10 ميلليون دوللار جۇمساۋدى جوسپارلاپ وتىرمىز»، - دەدى ول.
قولدانىستاعى تەرمينالدى جاڭارتۋدى ەسكەرە وتىرىپ، الماتى حالىقارالىق اۋەجايىنىڭ جالپى وتكىزۋ قابىلەتى جىلىنا 14 ميلليون جولاۋشىعا دەيىن ارتادى.
2023-جىلدىڭ اياعىندا اۋەجاي 9,5 ميلليون ادامعا قىزمەت كورسەتتى. جاڭا تەرمينالدىڭ تەلەسكوپيالىق كوپىرلەرى ۇشاقتىڭ كولەمىنە بايلانىستى ءبىر ۋاقىتتا جەتى ۇشاقتى قابىلداي الادى.
ديزاينعا سايكەس، قۇرىلىم قولدانىستاعى تەرمينال عيماراتىنا جەرۇستى وتكەلى ارقىلى قوسىلادى. جاڭا ءۇي-جاي جولاۋشىلارعا عيماراتتىڭ سىرتىنا شىقپاي-اق ىشكى جانە حالىقارالىق رەيستەردەن اۋىسۋعا وڭاي قول جەتكىزۋدى قامتاماسىز ەتەدى.
«جاڭا حالىقارالىق جولاۋشىلار تەرمينالىنىڭ قۇرىلىسى 87 پايىزعا ورىندالدى»، - دەپ اتاپ ءوتتى ول.
بۇعان دەيىن الپ ەر تۋنگا ەرسوي جاڭا تەرمينال 2024-جىلدىڭ جازىندا قولدانىسقا بەرىلەتىنىن ايتقان بولاتىن.
اۆتور
الما مۇقانوۆا
