ايەلدەردە بولۋى مۇمكىن جۇرەك اۋرۋلارىن قالاي ەمدەۋ كەرەك - دارىگەر كەڭەسى
الماتى. KAZINFORM - جۇرەك اۋرۋى - ەرلەر مەن ايەلدەر ءولىمىنىڭ نەگىزگى سەبەپتەرىنىڭ ءبىرى. بۇل رەتتە ايەلدەردە جۇرەك اۋرۋىنىڭ بەلگىلەرى، كورىنىسى مەن ەمدەۋدە ەرەكشەلىكتەر بولۋى مۇمكىن. بۇل تۋرالى الماتى قالالىق كارديولوگيا ورتالىعىنىڭ دارىگەرى ءامينا راكيشيەۆا ايتىپ بەردى.
دارىگەردىڭ ايتۋىنشا، ايەلدەردە جۇرەك بۇلشىقەتىنىڭ قانمەن جەتكىلىكتى تۇردە قامتاماسىز ەتىلمەۋىنە بايلانىستى پايدا بولاتىن جۇرەكتىڭ يشەميالىق اۋرۋى ءجيى كەزدەسەدى.
«ايەلدەردە جۇرەكتىڭ يشەميالىق اۋرۋىنىڭ بەلگىلەرى ەرلەردەگىدەي انىق كورىنبەۋى مۇمكىن. ايەلدەر شارشاۋ، ەنتىگۋ، السىزدىك، جۇرەك اينۋ، ءتىپتى ارقا نەمەسە جاقتاعى اۋىرسىنۋدى سەزىنۋى مۇمكىن. سونداي-اق، ايەلدەردە ءجيى كەزدەسەتىن كەەلسى اۋرۋ - اريتميا، ياعني، جۇرەك ىرعاعىنىڭ بۇزىلۋى. ايەلدەردە اريتميا سۋبتيلدى تۇردە كورىنۋى مۇمكىن، ول سونداي-اق ءجيى بايقالمايدى. ونىڭ بەلگىلەرى جۇرەكتىڭ شالىس سوعۋى، جۇرەك سوعۋ جيىلىگىنىڭ جوعارىلاۋى، باس اينالۋ نەمەسە السىزدىك جاتۋى مۇمكىن»، - دەيدى دارىگەر.
سونداي-اق جۇرەك جەتكىلىكسىزدىگى، كلاپان اقاۋى، گيپەرتونيا، باسقا دا جۇرەك اۋرۋلارىنا نازار اۋدارۋ ماڭىزدى. ايەلدەردە بۇل اۋرۋلاردىڭ كورىنىسى مەن ەمىندە وزىندىك ەرەكشەلىكتەر بولۋى مۇمكىن.
«ايەلدەردە جۇرەك اۋرۋلارىن ەمدەۋ ءدارى-دارمەك تەراپياسى، ءومىر سالتىن تۇزەتۋ، دۇرىس تاماقتانۋ، فيزيكالىق بەلسەندىلىك، ابلياتسيا پروتسەدۋرالارى، ءتىپتى حيرۋرگيالىق ارالاسۋدى قامتۋى مۇمكىن. جۇرەك اۋرۋىن وزدىگىنەن دياگنوستيكالاۋ مەن ەمدەۋ قاۋىپتى بولۋى مۇمكىن ەكەنىن ەستە ۇستاعان ءجون، سوندىقتان جۇرەك پروبلەمالارىنا كۇدىك تۋىنداعان كەزدە دياگنوز قويۋ جانە ءتيىستى ەم تاعايىنداۋ ءۇشىن دارىگەرگە كورىنۋ كەرەك. جۇرەك پروبلەمالارىن ۋاقتىلى انىقتاۋ جانە ەمدەۋ دەنساۋلىق پەن ءومىر ساپاسىن ساقتاۋعا كومەكتەسەدى»، - دەدى ءامينا راكيشيەۆا.
اۆتور
دۋمان ارعىنگەلدى
