اۋىلداردىڭ ينفراقۇرىلىمىن دامىتۋعا 900 ميلليارد تەڭگە ءبولىندى
استانا. KAZINFORM - بيىل اۋىلداردىڭ ينفراقۇرىلىمىن دامىتۋعا 900 ميلليارد تەڭگە ءبولىندى. بۇل تۋرالى بۇگىن ۇكىمەت وتىرىسىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.
«اۋىل - ەل بەسىگى» باعدارلاماسىن ىسكە اسىرۋ اۋىلدىق جەرلەرگە جەكە ينۆەستيتسيالار تارتۋعا وڭ اسەرىن تيگىزۋدە. مينيسترلىك تاراپىنان 2023-جىلى بيۋدجەت قاراجاتى شىعىستارىنىڭ تيىمدىلىگىنە تالداۋ جۇرگىزىلدى. مىسال رەتىندە، تۇركىستان وبلىسىنىڭ تولە بي اۋدانىنىڭ 16 اۋىلى 3,5 ميلليارد تەڭگەگە بيۋدجەتتەن قارجىلاندىرىلدى. وسى اۋىلداردا 21,2 ميلليارد تەڭگەگە 40 جوبانى ىسكە اسىرۋعا جەكە ينۆەستيتسيا تارتىلدى. وسىلايشا، 1 بيۋدجەتتىك تەڭگەگە 6 جەكە ينۆەستيتسيا تەڭگەسى تيەسىلى ەكەنىن كورىپ وتىرمىز. ال اقمولا وبلىسىنىڭ جاقسى اۋدانىنىڭ 6 اۋىلىنا 1 بيۋدجەتتىك تەڭگەگە 3 جەكە ينۆەستيتسيا تەڭگەسى تارتىلدى»، - دەدى ول.
مينيستر اۋىلدىق اۋماقتاردى دامىتۋعا ينۆەستيتسيا سالاتىن جەكە كاسىپكەرلەردىڭ ماڭىزدى ءرولىن دە اتاپ ءوتتى.
«2023 -جىلى كاسىپكەرلەر ءوز قاراجاتى ەسەبىنەن اۋىلدىق جەرلەردە مەكتەپتەر، شيپاجايلار، بالاباقشالار، دەمالىس ورىندارى جانە باسقا دا نىساندار سالدى. مينيسترلىك تاراپىنان جىل سايىن بارلىق قارجى كوزدەرى ەسەبىنەن اۋىلداردىڭ ينفراقۇرىلىمىن دامىتۋعا بولىنەتىن قاراجاتقا مونيتورينگ جۇرگىزىلەدى. ماسەلەن، 2023 -جىلى رەسپۋبليكالىق جانە جەرگىلىكتى بيۋدجەتتەردەن، سونداي-اق باسقا دا قارجى كوزدەرىنەن شامامەن 1 تريلليون تەڭگە الەۋمەتتىك، ينجەنەرلىك، كولىكتىك ينفراقۇرىلىمدى، قوعامدىق جانە ەكولوگيالىق قاۋىپسىزدىكتى دامىتۋعا باعىتتالعان. بيىل بۇل ماقساتتارعا شامامەن 900 ميلليارد تەڭگە جوسپارلانعان»، - دەدى نۇرلان بايبازاروۆ.
اۆتور
مارلان جيەمباي
