اۋىلدا قارا جۇمىس ىستەپ جۇرگەن تانىمال اقىن جان سىرىن ايتتى

استانا. قازاقپارات- ەسترادامىزداعى حيت اندەردىڭ ءسوزىن جازعان اقىن،  «كۇمىس قالام» يەگەرى ەرشات قايبولدين نۇرسەيىت جىلقىشىبايعا سۇحبات بەردى.

بۇل تۋرالى Bugin.kz ءتىلشىسى «ۋاقىت كورسەتەدى» باعدارلاماسىنا سىلتەمە جاساپ حابارلايدى.

اقىننىڭ بيىل ءۇي الامىن دەپ باققان 11 جىلقىسى قىستا قىرىلىپ قالعان. قانشا تانىمال اندەردىڭ ءسوزىن جازسا دا اقىن اۋىلىندا قارا جۇمىس ىستەپ كۇن كورەدى. ول اناسىنىڭ تۋعان كۇنىنە سىيلىق ساتىپ الۋعا اقشاسى بولماي، ولەڭ جازىپ قۇتتىقتاعانىن ايتتى. جۋرناليست ونىڭ نەگە اقشاسى جوق بولعانىنا تاڭىرقاپ، ءان ءسوزىن قانشاعا ساتاتىنى تۋرالى سۇرادى.

ەرشات بۇل سۇراققا:

«مەن ەشقاشان ولەڭىمدى ساۋدالاپ كورگەن جوقپىن. «اقىندىق - اردىڭ ءىسى»، - دەگەن عوي مۇقاعالي. ماعان وسىنداي اقشا بەر دەپ ايتپاپپىن. «سەن قورقاقسىڭ» دەگەن ءاننىڭ ءسوزىن جازعاندا، نۇربولات ابدۋليننەن 20 مىڭ تەڭگە العام. تويلارعا شىققاننان كەيىن، ءان حيت بولعاندا اقشا بەردى. جىلادىم (اقىن كوزىنە جاس الىپ قالدى، - اۆت). ىشىمدە ءبارى تولىپ قالدى»، - دەدى.

ەرشات قايبولدين «سەن قورقاقسىڭ»، «ەركەكپىن مەن»، «دوستارعا»، «ماحابباتىم»، «بيلە، جەڭگە»، «كورىكتىم»، «ۇلىما اقىل» سەكىلدى اندەردىڭ ءسوزىن جازعان.

نۇرسەيىت جىلقىشىباي ەرشاتتىڭ ۇلىنا تاي اتاپ، قولداۋ ءبىلدىردى.

 ەرشات قايبولدين جازعان حيت اندەردى وسى سىلتەمەنى باسىپ كورىڭىز.