اۋىل تۇرعىنى قۇسبەگىلىك ارقىلى تۋريزمدى دارىپتەپ ءجۇر
وسكەمەن. KAZINFORM - شىعىس قازاقستان وبلىسى ۇلان اۋدانىندا قۇسبەگىلىكتى بەكزات ونەر رەتىندە عانا ەمەس، ءوڭىردىڭ تۋريستىك الەۋەتىن تانىتۋدىڭ ءبىر تەتىگى رەتىندە قارايتىن وتباسى تۇرادى. باقىتبەك ماناي ۇلى جۇبايى ارداق جومارت قىزىمەن بىرگە قۇسىن قولىنا الىپ، ءتۇرلى فەستيۆالدە تۋريستەر ىقىلاسىنا بولەنىپ ءجۇر. Kazinform ءتىلشىسى ونى اڭگىمەگە تارتىپ كوردى.
— ءسىزدى سوڭعى ۋاقىتتا تۋريستەر نازارىنا ءجيى ءتۇسىپ جۇرگەن تۇرعىنداردىڭ ءبىرى دەسەك ارتىق ايتقاندىق ەمەس. بۇركىتتى قانداي ءىس-شارالارعا الىپ شىعاسىز؟
— سوڭعى جىلدارى وبلىس اۋماعىندا ۇلتتىق فەستيۆال، جيىن، سپورتتىق سايىستار ءجيى بولىپ ءجۇر. سولاردىڭ قايسىسىنا بارساق تا، قولىنا قۇسىن كوتەرىپ جۇرگەن ادامعا كوزقاراس بولەك. ءوڭىردىڭ ءار تۇكپىرىنەن، رەسپۋبليكا مەن شەتەلدەردەن مەيماندار كەلەتىن ءىس-شارالاردان قالىس قالماۋعا تىرىسامىن. جۇبايىم دا اركەز جانىمدا. شاراعا بارماس بۇرىن قاراپايىم ءجۇرىس- تۇرىسىمىزدى، بۇركىتپەن سەرۋەندەۋ الاڭىن شامالاپ، بەكىتىپ الامىز.
— وسىدان 2 جىل بۇرىن ۇلان اۋدانى اۋماعىنداعى قىزىلتاس تاۋىنا شىعاتىن فەستيۆالگە دە قاتىسقان ەدىڭىز. بىرەۋلەر جۇگىرىپ، بىرەۋلەر اسىقپاي ءجۇرىپ شىعا الماعان تاۋعا ءسىز قۇسىڭىزبەن بىرگە كوتەرىلدىڭىز. سول كەزدەن بەرى قۇسپەن سۋرەتكە ءتۇسۋدى تۋريزمدى دامىتۋدىڭ ءبىر امالى رەتىندە قاراستىرىپ كەلەسىز بە؟
— ءيا. بۇل ءبىر جاعىنان ءناپاقا تابۋدىڭ جولى. ونىمەن قوسا، الىس-جاقىننان كەلگەن قوناقتار قىزىقتاپ، بۇركىتتى سيپاپ، سۋرەتكە تۇسكىسى كەلىپ جاتادى. شىعىس قازاقستاندا قۇس ۇشىراتىن ادامدار كوپ ەكەن دەگەن تۇسىنىك قالىپتاستىرۋ ارقىلى قوناقتاردىڭ تۋعان ولكەمىزگە دەگەن ماحابباتىن تۋعىزعىم كەلدى.
— بيىل كاتونقاراعاي اۋدانىنا ءانشى ديماش قۇدايبەرگەن ۇلى كەلگەندە دە ءسىزدى جۇبايىڭىزبەن بىرگە كوپتىڭ اراسىنان كوردىك. حالىق جان-جاقتان قاۋمالاپ، سۋرەتكە ءتۇسۋ ءۇشىن سىزدەرگە كەزەككە ءتۇسىپ جاتتى. سول تۋرالى ايتىپ بەرسەڭىز.
— «التاي — تۇركى الەمىنىڭ التىن بەسىگى» فەستيۆالىنە زايىبىم ارداقپەن ارنايى باردىق. قوناق رەتىندە شاقىرىلعان ەدىك. سوندا فوتوايماق ۇيىمداستىردىق. كاتونقاراعايداعى ءدۇبىرلى دۋمان تاماشا ءوتتى. بەكزات ونەرىمىز دە دارىپتەلدى، دەمالىپ تا قايتتىق. ءبىز ۇلتتىق قۇندىلىقتى بيىككە شىعارعىمىز كەلەدى.
— قاشاننان بەرى قۇس باپتاپ كەلەسىز؟
— جالپى، ءوزىم 2019 -جىلدان بەرى قىران باپتاپ كەلەمىن. بۇركىت ءبىر جىلقىنىڭ سوعىم ەتىن جەپ قويادى. ءبىراق ونىڭ دا ءوز ءتارتىبى بار. سويىلعان مال ەتىن مۇزداتقىشقا سالىپ قاتىرىپ، كەيىن بىرتىندەپ ءجىبىتىپ بەرىپ وتىرامىز.
— قۇستىڭ قىستاعى كۇتىمى قالاي؟
— اڭشىلىق ماۋسىم اشىلىپ، رۇقسات العان سوڭ قىران قۇسىن ۇشىرامىز. ال قىس كەزىندە العان اڭنىڭ ەتى بەرىلەدى. قىسقاسى، قىس پەن جازعى كۇتىم ەكى ءتۇرلى. قازىر اسىراپ وتىرعان قوس قىرانىم — قىران جانە مۇزبالاق. كاتونقاراعاي اۋدانى ۇلاننان ءبىرشاما الىس. ءبىراق اپارۋ كەزىندە بالەندەي قيىندىق سەزىلمەدى. كولىكتىڭ ارتقى سالونىنان ورىن دايىنداپ، ەكەۋىن امان-ەسەن جەتكىزدىك.
— ءتۇرلى ءىس- شاراعا بارعاندا ەڭ الدىمەن كىمدەر قىزىعۋشىلىق تانىتىپ، سۋرەتكە تۇسۋگە اسىعادى؟
— بىزگە اسىرەسە تۋريستەر كوپ نازار اۋدارادى. «قولىندا قۇسى بار ەكەن» دەپ توقتاي قالىپ سۋرەتكە ءتۇسىپ، تاڭ-تاماشا بولىپ جاتادى. تابيعاتتىڭ سۇلۋلىعى مەن بۇركىتتىڭ سۇلۋلىعى قاتارلاسىپ، تاماشا كورىنىستىڭ كۋاسى بولعاندارىن ايتىپ كەتەدى. ءبىز دە قۋانامىز. جالپى، قىران دەگەن ءسوز اڭدى قىرىپ العان قۇس دەگەنمەن استاسادى. كەزىندە ءبىر اۋىلدى اسىراعان قۇس قوي، شىركىن.
— قۇس باپتاۋدى كوبى اڭشىلىق ماقساتتا قولعا العان. سىزدەر ءتۋريزمدى دە ناسيحاتتاپ جۇرسىزدەر. وسى بويىنشا تاعى قانداي ەرەكشە جوبالار مەن جوسپارلارىڭىز بار؟
— بۇركىتپەن تويعا شىعىپ تۇرامىز. ءبىراق كوپ بولمادى. وتباسىممەن بىرگە، تازى ەرتىپ، ەكى بۇركىتىمدى قولعا الامىن. كوپشىلىككە ۇنايتىن سەكىلدى. ۇيلەنەتىن جىگىتتى الىپ شىعامىن، سوسىن تۇساۋكەسەرگە دە شاقىرىپ تۇرادى. ءداستۇردى ناسيحاتتاپ، اتا-بابا مۇراسىن باسقا دا باعىتتاردا كورسەتۋگە بولادى.
— سوڭعى سۇراق، ءبىرى بۇركىت، ءبىرى قىران دەپ جاتادى. ەكەۋىنىڭ ايىرماشىلىعى بار ما؟
— ەكەۋى ءبىر عوي نەگىزى. ءبىراق ايتىلعاندا اركىمنىڭ قالاۋى، جەتكىزۋى تۇرلىشە. «مۇزبالاق» دەپ اسقار شىڭداردا جابايى اڭعا تىرناق سالعان ەپتى قۇسقا اسپەتتەپ اتاۋ بەرگەن. العىر، ايلالى قۇس. جۇبايىم ەكەۋىمىز وسى ءىستى بارىنشا دوڭگەلەتۋگە تىرىسامىز.
— اڭگىمەڭىزگە راقمەت!
اۆتورلار
بوتاكوز كەنجەحان قىزى
