دامىعان كولىك لوگيستيكاسى بولماسا، كۇشتى ەلدىڭ ءوزى قۇردىمعا كەتەدى - مەملەكەت باسشىسى
استانا. KAZINFORM - ۇكىمەت لوگيستيكا سالاسىنداعى جوبالاردىڭ ساپالى ءارى ۋاقتىلى ورىندالۋىن قاتاڭ باقىلاۋعا الادى. بۇل تۋرالى قۇرىلتاي وتىرىسىندا «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىن جاريالاپ جاتقان پرەزيدەنت قاسىم-جومارت توقايەۆ ايتتى.
- لوگيستيكا ينفراقۇرىلىمىن دامىتۋعا باسا ءمان بەرۋ قاجەت. بۇل - ەلىمىزدىڭ ءوسىپ-وركەندەۋىنە ىقپال ەتەتىن ماڭىزدى فاكتوردىڭ ءبىرى. قازىرگى تاڭدا لوگيستيكا ماسەلەسىمەن بارلىق ەلدەر اينالىسۋدا. دامىعان كولىك لوگيستيكاسى بولماسا، ءتىپتى، بۇگىنگى كۇشتى ەل ەرتەڭ قۇردىمعا كەتەدى، - دەدى قاسىم-جومارت توقايەۆ.
پرەزيدەنت كەلەسى جىلى ەلىمىزدە «باقتى-اياگوز» تەمىرجول جەلىسى ىسكە قوسىلاتىنىن ايتتى.
- جاڭا باعىتتىڭ ارقاسىندا قىتايمەن اراداعى جۇك وتكىزۋ مۇمكىندىگى 20 ميلليون تونناعا ارتادى. تامىز ايىندا «ارال-كاسپي» كۇرە جولىنىڭ قۇرىلىسى باستالدى. بۇل جوبا ترانسكاسپي ءدالىزىنىڭ قاشىقتىعىن شامامەن 1 مىڭ شاقىرىمعا قىسقارتىپ، جۇك جەتكىزۋ مەرزىمىن ءۇش كۇنگە دەيىن ازايتادى. ۇكىمەت وسى سالادا قولعا الىنعان بارلىق جوبانىڭ ساپالى ءارى ۋاقتىلى ورىندالۋىن قاتاڭ باقىلاۋعا الادى، - دەدى مەملەكەت باسشىسى.
بۇعان دەيىن مەملەكەت باسشىسى ەل ومىرىندەگى تاريحي وزگەرىستەردىڭ بارلىعى حالىقتىڭ كوز الدىندا بولىپ جاتقانىن ايتقان ەدى.
