اتىراۋلىق جىگىت 20 مۋزىكالىق اسپاپتا وينايدى
اتىراۋ. KAZINFORM - اتىراۋلىق ونەرپاز ابزال سيعۋاتوللا ۇلى 20 مۋزىكالىق اسپاپتا وينايدى. قازىر «سارماد» ەتنو-فولكلورلىق انسامبلىندە جۇمىس ىستەيدى.
ونەرلى جىگىت قىزىلقوعا اۋدانىنىڭ جاسقايرات اۋىلىندا ومىرگە كەلگەن. وسىنداعى مەكتەپ، كلۋب ساحناسىندا ءان ايتىپ، دومبىرا شەرتكەن ۇلىنىڭ ونەرىن ۇشتاۋدى كوزدەگەن. ءسويتىپ، اتىراۋ قالاسىنا قونىس اۋدارعان.
«بالا كەزىمدە مۋزىكالىق اسپاپتاردا ويناۋعا قىزىققان ەدىم. اكەم مەنىڭ ونەرلى بولعانىمدى قالاپ، ىنتامدى وياتتى. اكەمنىڭ كەڭەسىمەن اتىراۋ قالاسىنداعى ن. تىلەنديەۆ اتىنداعى دارىندى بالالارعا ارنالعان اكادەميادا ۆوكال، پيانينو سىنىبىندا وقىدىم. جوعارى ءبىلىمدى ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ونەر فاكۋلتەتىنەن الىپ شىقتىم. كەيىن ءبىلىمىمدى جەتىلدىرۋدى كوزدەپ، قۇرمانعازى اتىنداعى قازاق ۇلتتىق كونسەرۆاتورياسىندا اكادەميالىق ۇتقىرلىق باعدارلاماسىمەن وقۋىمدى جالعاستىردىم»، - دەيدى ابزال سيعۋاتوللا ۇلى.
ءوزىنىڭ ايتۋىنشا، ستۋدەنتتىك كەزەڭىن تەككە وتكىزبەي، مۋزىكالىق اسپاپتاردا ويناۋعا دەن قويعان. ءار اسپاپتىڭ تاريحىن، جاسالۋ جولىن جەتىك بىلەدى. قازىر جيىرما ءتۇرلى اسپاپتا ەركىن وينايدى. قازاقتىڭ ۇلتتىق مۇراسى - دومبىرانىڭ قوس ىشەگىنەن كۇمبىرلەتە كۇي توگەدى. قىلقوبىزبەن قورقىت داۋىرىنەن جەتكەن ۇلى دالا سازىن سىزىلتادى. سىرنايمەن سىرلى اۋەندەردى اۋەلەتەدى. پيانينومەن كلاسسيكالىق مۋزىكالاردى ناقىشىنا كەلتىرە ورىندايدى. گيتارا، بايان، جەتىگەن سەكىلدى اسپاپتاردا ويناۋدى مەڭگەرىپ العان.
«العاشقىدا دومبىرا تارتۋدى ۇيرەنگەن ەدىم. ءبىراق تەك ءبىر اسپاپپەن شەكتەلگىم كەلمەدى. ونەر جولىن تاڭداعان سوڭ بىرنەشە اسپاپتا ويناعاندى ءجون كوردىم. سول ماقساتىما جاقىنداپ كەلەمىن. ويتكەنى ءالى دە بىرنەشە اسپاپتا ويناۋدى كوزدەپ ءجۇرمىن»، - دەيدى ابزال سيعۋاتوللا ۇلى.
ءتۇرلى اسپاپتى قولىنان السا، ون ساۋساعىنان ساز توگىلەتىن ونەرلى جىگىت د. نۇرپەيىسوۆا اتىنداعى اكادەميالىق قازاق حالىق اسپاپتارى وركەسترى جانىنداعى «سارماد» ەتنو- فولكلورلىق انسامبلىندە جۇمىس ىستەيدى. سونىمەن بىرگە DD RECORDS توبىنىڭ قۇرامىندا ونەر كورسەتىپ ءجۇر.
ەسكە سالا كەتەلىك، بۇعان دەيىن اتىراۋدا تۇراتىن شەتەلدىكتىڭ بولاشاعىن دومبىراسىز ەلەستەتە المايتىنىن جازعان ەدىك.
اۆتور
جولداسبەك شوپەعۇل
