اتىراۋدىڭ ەكس-اكىمىنىڭ ءىسى: شەنەۋنىكتەرگە تاعىلعان قانداي ايىپتاۋلار راستالمادى

اتىراۋ. KAZINFORM - اتىراۋ قالاسىنىڭ بۇرىنعى اكىمى قايرات ورازبايەۆ پەن جەر قاتىناستارى ءبولىمىنىڭ باسشىسى ناۋرىزبەك قۇماروۆقا، ساۋلەت جانە قالا قۇرىلىسى ءبولىمىنىڭ باسشىسى ەرلان قابدينوۆكە، اكىمدىك اپپاراتىنىڭ ءبولىم باسشىسى جىگەر يباتوللا ۇلىنا قاتىستى قىلمىستىق ىستە بىرنەشە ايىپتاۋ راستالعان جوق.

اكىمدىكتىڭ بۇرىنعى لاۋازىمدى باسشىلارىنا قاتىستى قىلمىستىق ءىس اتىراۋ قالاسىنداعى №2 سوتىندا قارالدى.

سوت ماتەريالدارىنا قاراعاندا، قىلمىستىق قۋدالاۋ ورگاندارى تەرگەۋىنىڭ قورىتىندىسىمەن ەكس-اكىم مەن بۇرىنعى ءبولىم باسشىلارى بىرنەشە باپپەن ايىپتالعان.

ماسەلەن، قالا اكىمى قايرات ورازبايەۆقا ق ر قىلمىستىق كودەكسىنىڭ 361-بابىنىڭ 4-بولىگىنىڭ 3-تارماعى (لاۋازىمدىق وكىلەتتىكتەردى تەرىس پايدالانۋ)، 369-بابىنىڭ 3-بولىگى (قىزمەتتىك جالعاندىق جاساۋ) بويىنشا؛ قالالىق جەر قاتىناستارى ءبولىمىنىڭ باسشىسى ناۋرىزبەك قۇماروۆقا، اكىم اپپاراتى ءبولىمىنىڭ باسشىسى جىگەر يباتوللا ۇلى مەن ساۋلەت جانە قالا قۇرىلىسى ءبولىمىنىڭ باسشىسى ەرلان قابدينوۆكە 361-بابىنىڭ 4-بولىگىنىڭ 3-تارماعى (لاۋازىمدىق وكىلەتتىكتەردى تەرىس پايدالانۋ)، 369-بابىنىڭ 1-بولىگىمەن (قىزمەتتىك جالعاندىق جاساۋ)، 190-بابىنىڭ 4-بولىگىنىڭ 2-تارماعىمەن (الاياقتىق) ايىپ تاعىلعان.

- سوت تالقىلاۋىنىڭ قورىتىندىسىندا مىناداي جايتتار انىقتالدى. قايرات ورازبايەۆ قالا اكىمى بولا تۇرا، جەر قاتىناستارى ءبولىمىنىڭ باسشىسى ناۋرىزبەك قۇماروۆقا، ساۋلەت جانە قالا قۇرىلىسى ءبولىمىنىڭ باسشىسى ەرلان قابدينوۆكە رەكرەاتسيالىق ايماقتاعى 8 جەر ۋچاسكەسىن بەرۋ تۋرالى تاپسىرما بەرگەن. سوتتالۋشىلار ناۋرىزبەك قۇمارروۆ پەن ەرلان قابدينوۆ ءوزارا ءسوز بايلاسىپ، رەكرەاتسيالىق جانە سانيتارلىق ايماقتارداعى 18 جەر ۋچاسكەسىن بەرگەن. بۇل ءۇشىن ناۋرىزبەك قۇماروۆ جەر كوميسسياسىنىڭ حاتتاماسىنىڭ قوسىمشاسىنا كوميسسيا وتىرىسىندا قارالعان دەپ 18 ءوتىنىش تۋرالى جالعان مالىمەتتەر ەنگىزگەن، - دەپ حابارلادى سوتتىڭ باسپا ءسوز قىزمەتى.

الايدا بىرنەشە ايىپتاۋ راستالمادى. بىرىنشىدەن، جىگەر يباتوللا ۇلى قىزمەتتىك وكىلەتتىكتەردى اسىرا پايدالاندى دەگەن ايىپپەن ونىڭ وسى قىلمىستى جاساۋعا قاتىسى بار ەكەندىگى تۋرالى جەتكىلىكتى دالەلدەر ۇسىنىلماعان. ونىڭ قىزمەتتىك وكىلەتتىگىنە رەكرەاتسيالىق جانە سانيتارلىق ايماقتارداعى جەر ۋچاسكەلەرىن بەرۋ ماسەلەسى كىرمەگەن.

ەكىنشىدەن، قايرا ورازبايەۆ پەن جىگەر يباتوللا ۇلىنا تاعىلعان ايىپتاۋدا قانداي قۇجاتتارعا (جەر ۋچاسكەسىن تاڭداۋ اكتىلەرى، جەر كوميسسياسىنىڭ حاتتامالارى جانە ت. ب. ) جالعان مالىمەتتەر نەمەسە تۇزەتۋلەر ەنگىزىلگەنى ناقتىلانباعان.

ۇشىنشىدەن، اتالعان سوتتالۋشىلارمەن قۇجاتتارعا جالعان مالىمەتتەر ەنگىزىلۋ فاكتىلەرى انىقتالماعان.

تورتىنشىدەن، قىلمىستىق قۋدالاۋ ورگانىمەن مۇلىكتى جىمقىرۋ دالەلدەرى ۇسىنىلماعان. سوتتالۋشىلاردىڭ بىردەي ارەكەتتەرى وكىلەتتىكتەردى تەرىس پايدالانۋ جانە الاياقتىق رەتىندە ءارتۇرلى باپتار بويىنشا دارەجەلەنگەن.

- قايرات ورازبايەۆ پەن ەرلان قابدينوۆ قر قىلمىستىق كودەكسىنىڭ 361-بابىنىڭ 4-بولىگىنىڭ 3-تارماعىمەن (لاۋازىمدىق وكىلەتتىكتەردى تەرىس پايدالانۋ) كىنالى دەپ تانىلدى. ەرلان قابدينوۆكە 5 جىل مەرزىمگە باس بوستاندىعىن شەكتەۋ، قايرات ورازبايەۆقا تاعىلعان ايىپتىڭ از كولەمى ەسكەرىلىپ، 3 جىل مەرزىمگە باس بوستاندىعىن شەكتەۋ تۇرىندەگى جازا تاعايىندالدى. ناۋرىزبەك قۇماروۆ 361-باپتىڭ 4-بولىگىنىڭ 3-تارماعىمەن (لاۋازىمدىق وكىلەتتىكتەردى تەرىس پايدالانۋ) جانە 369-بابىنىڭ 1-بولىگىمەن (قىزمەتتىك جالعاندىق جاساۋ) كىنالى دەپ تانىلىپ، وعان 6 جىل مەرزىمگە باس بوستاندىعىن شەكتەۋ تۇرىندەگى جازا بەرىلدى. ولار ءومىر بويىنا مەملەكەتتىك قىزمەتتە لاۋازىمداردى اتقارۋ قۇقىعىنان ايىرىلدى، - دەپ ءمالىم ەتتى سوتتان.

ال جىگەر يباتوللا ۇلى ق ر قىلمىستىق كودەكسىنىڭ 361-بابىنىڭ 4-بولىگىنىڭ 3-تارماعى بويىنشا ونىڭ ارەكەتتەرىندە قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى اقتالدى.

سونداي-اق قايرات ورازبايەۆ، ەرلان قابدينوۆ پەن جىگەر يباتوللا ۇلى 369-بابىنىڭ 1-بولىگى بويىنشا، ەرلان قابدينوۆ، ناۋرىزبەك قۇماروۆ جانە جىگەر يباتولا ۇلى 190-بابىنىڭ 4-بولىگىنىڭ 2-تارماعىندا كوزدەلگەن قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى اقتالدى.

سوت ۇكىمى زاڭدى كۇشىنە ەنگەن جوق.

ەسكە سالا كەتەلىك، بۇعان دەيىن اتىراۋ قالاسىنىڭ ەكس- اكىمى قايرات ورازبايەۆتىڭ ىسىنە قاتىستى سوت ۇكىمى شىققانىن جازعان ەدىك.

جولداسبەك شوپەعۇل

اۆتور