اتىراۋدا تۇراتىن ۇلى بريتانيالىق 20 شاقتى كۇي بىلەدى

шетелдік күй
Фото: 24.kz

استانا. قازاقپارات - اتىراۋعا ۇلى بريتانيادان كوشىپ كەلگەن سابينا ماستەرس قازاقتىڭ ءتول ونەرىنە قىزىعۋشىلىق تانىتىپ، قازىر دومبىرا تارتۋدى ۇيرەنگەن، دەپ حابارلايدى 24KZ.

بۇگىندە 20 عا جۋىق كۇي بىلەدى. ءتىپتى كۇيشىلەر كونكۋرسىنا قاتىسىپ، ارنايى جۇلدەگە دە يە بولعان.

سابينا ماستەرستىڭ اتىراۋعا كوشىپ كەلگەنىنە 5 جىلعا جۋىقتاعان. كۇيەۋىنىڭ جۇمىس بابىنا وراي ەلىمىزدىڭ باتىسىنا قونىستانعان شەتەلدىكتىڭ ءتول ونەرگە دەگەن ىقىلاسى بولەك. توكپە كۇيلەردى دە ناقىشىنا كەلتىرىپ ورىندايدى.

سابينا ماستەرس، ۇلى بريتانيا ازاماتى:

- 2019-جىلى دينا نۇرپەيىسوۆا اتىنداعى حالىق اسپاپتار وركەسترىنىڭ كونسەرتىنە باردىم. سالتاناتتى ءىس-شارادا دومبىرانىڭ ءۇنىن ەستىپ، قايران قالعانمىن. سول ءسات جۇرەگىمە ەرەكشە اسەر ەتتى. كەيىن دومبىرا تارتۋدى ۇيرەنەمىن دەپ شەشتىم. مەن - 4 بالانىڭ اناسىمىن. بالالارىمنىڭ دا مۋزىكاعا قابىلەتى بار.

سابينا قازىر 20 شاقتى كۇي بىلەدى. الداعى ۋاقىتتا قۇرمانعازى مەن دينانىڭ، داۋلەتكەرەيدىڭ كۇيلەرىن تولىق مەڭگەرۋدى ماقسات ەتكەن. ۇستازى ەرلان ساقتانوۆ شەتەلدىك شاكىرتىنىڭ ىنتاسىنا ريزا. اپتاسىنا 2-3 رەت ساباق بەرەدى.

ەرلان ساقتانوۆ، د. نۇرپەيىسوۆا اتىنداعى حالىقتىق مۋزىكا اكادەمياسىنىڭ وقىتۋشىسى:

- سابينامەن العاش كەزدەسكەندە ول كىسىنى ويلاعام، دومبىراعا تەك جاي عانا قىزىعۋشىلىعى بولار دەپ. ءبىراق ۋاقىت وتە كەلە، ول كىسىنىڭ دومبىراعا دەگەن ءوزىنىڭ كوزقاراسى، ۇستانىمى، جالپى مەڭگەرۋى مەنى تاڭعالدىردى. ول كىسى ءاربىر كۇيدىڭ تاريحىن بىلۋگە تىرىسادى. قازاقتىڭ سالت-ءداستۇرى مەن دومبىرا تۋرالى ماعلۇماتتاردى الەۋمەتتىك جەلىدەن ىزدەپ جۇمىستانادى.

سابينا ماستەرس جاقىندا ءوزىنىڭ شىعارماشىلىق كەشىن بەردى. وڭىرگە بەلگىلى ونەر جۇلدىزدارى ونەرپازدىڭ شاشباۋىن كوتەرىپ، قولداۋ كورسەتتى. وبلىستاعى ءتۇرلى كۇي سايىستارىنا دا قاتىسىپ ءجۇر. قازاق ءتىلىن مەڭگەرۋدى دە قولعا العان. سابينا سالاۋاتتى ءومىر سالتىن ۇستانادى. كۇي ساباعىنا ۆەلوسيپەدىمەن كەلىپ-كەتەدى. قازاقتىڭ ۇلتتىق ونەرىنە قىزىعىپ، ءتىلىن ۇيرەنىپ جۇرگەن شەتەلدىك كەلىنشەكتىڭ ارەكەتى كوپكە ۇلگى ەكەنى اقيقات.

سوڭعى جاڭالىقتار